خەڵك-
بەڕێوەبەرایەتی پۆلیسی سلێمانی ئاشكرای دەكات، كە دوو كەس لە سلێمانی لەسەر دزی دەستگیر كراون و یەكێكیان ماددەی هۆشبەری پێبووە.
بەڕێوەبەرایەتی پۆلیسی پارێزگای سلێمانی لە ڕاگەیەنراوێكدا ئاماژەی بەوەكردووە، لەدوو چالاكی جیادا و لە لایەن بەشی پۆلیسی نەهێشتنی تاوانەوە، دوو تۆمەتبار دەستگیركران، كەیەكێك لەو تۆمەتبارانە لەكاتی دزیكردندا دەستگیركراوە و بڕێك مادەی هۆشبەری پێبووە، تۆمەتبارەكەی تر دزی لە چەند ماركێتێكی ناوشاری سلێمانی كردووە .
ئاماژەی بەوەشكردووە، لەچالاكییەكدا و لەلایەن مەفرەزەكانی نەهێشتنی تاوانەوە تۆمەتبارێك لەكاتی دزیكردندا دەستگیركرا و لەكاتی دەستگیركردنەكەشیدا بڕێك ماددەی هۆشبەری پێبووە، لەئێستادا تۆمەتبار ( ك ، أ ، أ ) بەبڕیاری بەڕێز دادوەر ڕاگیراوە و لێكۆڵینەوە لەگەڵیدا بەردەوامە .
ڕاشیگەیاندووە، لەچالاكییەكی تری نەهێشتنی تاوان تۆمەتبارێك دەستگیركراوە ،كە دزی لە چەند ماركێتێك كردبوو و پێشتریش لەسەر تاوانی دزیكردن دەستگیركراوە .
جەختیشی كردۆتەوە، تۆمەتبار ( ش ، غ ، م ) بەبڕیاری بەڕێز داوەر و بەپێی ماددەی 446 ڕاگیراوە و لێكۆڵینەوە لەگەڵیدا بەردەوامە .
