سەردێر

شەپۆلێكی دیكەی بەفر و باران ڕوو لە هەرێم دەكات

خەڵك
بەپێی پێشبینییەكانی كەشناسی، لەسبەی چوارشەممەوە، شەپۆلێكی دیكەی بەفرو بارانبارین ناوچەكانی هەرێمی كوردستان دەگرێتەوە و پلەكانی گەرماش بەڕێژەیەكی بەرچاو نزم دەبنەوە.

بەڕێوەبەرایەتی گشتی كەشناسی و بومەلەرزەزانی هەرێمی كوردستان لەڕاگەیانراوێكدا بڵاویكردەوە، “سبەی چوارشەممە لە شەودا نزمە پاڵەپەستۆی دەریای سپی ناوەڕاست رو لە ناوچەكەمان دەكات رۆژی پێنجشەممە كاریگەری ئەو شەپۆلە لەسەر ناوچەكەمان چالاكتر دەبێت لە تەواوی ناوچەكانی هەرێم، لەگەڵ بارانبارین بارستە هەواییەكی سارد یاوەری ئەم نزمە پاڵە پەستۆیە دەكات، بەفریش لەسەر ناوچە شاخاوییەكان دەبارێت”.

 

لە ڕاگەیانراوەكەدا ئەوەش هاتووە، لە سەنتەری پارێزگای هەولێر نمە باران و ناوچەكانی دیكە بارانی مامناوەندی دەبێت لەسەر ناوچە شاخاوییەكان بەفر بارین دەبێت، بە تایبەت ئەو ناوچە شاخاویانەی لە سەروی 1700 م لەسەر ئاستی روی دەریا.

 

باس لە ئەوەشكراوە،” لە سەنتەری سلێمانی و هەڵەبجە سەرەتا نمە بارانی دەبێت پاشان بۆ بارانی مامناوەند دەگۆڕێت لەسەر بەشەكانی دیكەی ئەو پارێزگایانە، پاشان بەفریش دەبێت و تەواوی ناوچە بەرزاییەكانی ئەم سنورە بەفریان لێدەبارێت، ئاستی بارانی پێشبینیكراو لە سنوری پارێزگای سلێمانی لە سەروی 10 ملم دەبێت”.

ئەوەش هاتووە، لە سەنتەری دهۆك لەگەڵ نمە باران هەندێكجار ئەگەرێكی كەمی بەفر بارینی هەیە و تەواوی ئەو ناوچە شاخاوییانەی كە بەرزیان لە سەروی 1500 مەتر لەسەر ئاستی روی دەریا، لە سەنتەری كەركوكیش نمە باران دەبێت لە هەندێكاتدا”.

 

بەڕێوەبەرایەتییەكە دەشڵێت، “كاریگەری ئەم شەپۆلە تا كاتەكانی بەرەبەیانی رۆژی هەینی لەسەر ناوچەكەمان دەمێنێتەوە، لە ماوەی ئەم شەپۆلە نزمبونەوەی بەرزترین پلەكانی گەرما دەبێت بە دو تا سێ پلە بە بەراورد بە ئەمڕۆ لەگەڵ بەرزبونەوەیەكی كەم لە نزمترین پلەكانی گەرما”.