سەردێر

گرژییەكان لە حەسەكە بەردەوامە

خەڵك

شەڕ و پێكدادان لە دەوروپشتی گرتووخانەی سەناعەی گەڕەكی غوێران لە شاری حەسەكەی رۆژئاوای كوردستان بەردەوامی هەیە.

بەپێی سەرچاوە رۆژنامەوانییەكان، فڕۆكە جەنگییەكانی هاوپەیمانان شەوی رابردوو نێو گرتووخانەی سەناعەیان بۆردوومانكردووە.

لەلایەكی دیكەوە سەدان تیرۆرست و توندڕۆی داعش دوای هەڵهاتنیان دەستگیركرانەوە و بەشێكی زۆریان خۆیان رادەستی هێزەكانی سووریای دیموكرات كرد.

هاوكات سووریای دیموكرات بانگەوازی ئاڕاستەی زیندانیانی نێو گرتووخانە كرد كە خۆیان بدەن بە دەست هێزە ئاسایشییەكان و هیچ بوارێكی دەربازبوونیان نەماوە.

لەوچوارچێوەیەدا بە فەرمانی هێزەكانی سووریای دیموكرات ژمارەیەك شەڕڤان دوورخرانەوە و ئاڕاستەی دادگایی سەربازی كران بۆ لێپرسینەوە لەسەر مامەڵە نەشیاویان پێَچەوانەوەی بنەماكانی هێزەكە، لەكاتی دەستگیركردنی توندڕۆكانی داعشدا.

ماوەی پێنج رۆژە شەڕ لە گرتووخانەی سەناعە لە حەسەكە بەردەوامی هەیە و تا ئێستا نەتوانراوە گرژییەكان كۆتایی پێ بهێندرێت.