سەردێر

هەسەدە؛ ئاماری گیان لەدەستدا و برینداربوونی هێرشەكەی داعشی بۆ سەر زیندانی غوێرانی حەسەكەی بڵاوكردەوە

خەڵك –
هێزەكانی سووریای دیموكراتیك ڕایدەگەیەنێت، لە هێرشەكەی داعش بۆ سەر زیندانی غوێرانی حەسەكە ١٧ شەڕڤان و هێزی ئاسایشی ناوخۆ و خۆبەخشانی دەزگا خزمەتگوزارییەكان شەهید بوون و ٢٣ی دیكەش برینداربوون.

ناوەندی ڕاگەیاندنی هێزەكانی سووریای دیموكراتیك (قەسەدە) لە ڕاگەیەندراوێكدا ژمارەی شەهید و بریندارەكانی هێرشی شانەكانی داعش بۆ سەر زیندانی غوێرانی حەسەكە بڵاوكردەوە و تێیدا هاتووە، لەهێرشی تیرۆریستی ئەم دواییەی داعش بۆ سەر زیندانی حەسەكە لە ٢٠ی كانوونی دووەمەدا، شەڕڤانان بەرخۆدانێكی بێوێنەیان لە پێناو پاراستنی ناوچەكە و دانیشتوان و ئاسایشی جیهان بەڕێوەبرد.

ئاماژە بۆ ئەوەشكراوە، لە كاتژمێرەكانی سەرەتاوە تا ئێستا ١٧ شەڕڤانیان لەهێزە سەربازییەكان و هێزە ئەمنییەكانی ناوخۆ و خۆبەخشانی دەزگا خزمەتگوزارییەكان لە بەرامبەر هێرشی تیرۆریستی و هەڵاتنی چەتەكان لە زیندانی سەناعە شەهیدبوون و ٢٣ كەسی دیكەشیان بریندار بوون .

لە ڕاگەیەندراوەكەدا هاتووە:

“لە هێرشی تیرۆریستیی ئەمدوایەی داعش بۆ سەر زیندانی حەسەكە لە ٢٠ی كانوونی دووەمەدا، شەڕڤانانی ئێمە بەرخۆدانێكی بێوێنەیان لە پێناو پاراستنی ناوچەكە و دانیشتوان و ئاسایشی جیهان بەڕێوەبرد. هەروەها شەڕڤانان بەو فیداكارییانە ڕێگەیان بە پلانی تیرۆریستان بۆ دستگرتن بەسەر زیندانەكەدا نەدا و رێگەیان لە رفاندنی تیرۆریستان گرت.

ئێمە وەك قەسەدە بە شانازییەوە ڕایدەگەیەنین، كە لە كاتژمێرەكانی سەرەتاوە تا ئێستا ١٧ شەڕڤانمان لە هێزە سەربازییەكان و هێزە ئەمنییەكانی ناوخۆ و خۆبەخشانی دەزگا خزمەتگوزارییەكان لە بەرامبەر هێرشی تیرۆریستی و هەڵاتنی چەتەكان لە زیندانی سەناعە شەهید بوون. هەروەها هیوای چاكبوونەوەی خێرا بۆ ٢٣ هەڤاڵمان و كرێكارە مەدەنییە بریندارەكان دەخوازین.

فیداكاری و بەرخۆدانی شەهیدەكانمان سەرچاوەی هێزن بۆ هەموو شەڕڤانانی ئێمە بۆ درێژەدان بە تێكۆشانی دژ بە ڕێكخستنی تیرۆریستی داعش و پشتیوانەكانیان”.