خەڵك-
دەیان قەیران و كێشە و نەبوونی و گرانی بازاڕ بەرۆكی هاووڵاتیانی گرتۆتەوە و بەردەوامیش نرخی سووتەمەنی (بەنزین و نەوت و غاز) و ئاو و كارەبا لەسەر هاووڵاتیان زیاد دەكرێت، بەڵام حكومەت پاڵپشتی كردنی كەرتی سووتەمەنی بڕیوە و بەردەوامیش باج و ڕسومات زیاد دەكات، لەكاتێكدا خێرخوازان بەردەوام لەڕێگەی هەڵمەتەكانیانەوە هاوكاری بۆ خەڵكانی هەژار و كەمدەرامەت كۆدەكەنەوە و زۆرترین هاوكاریش بۆ زیانلێكەوتووانی كارەساتە سروشتییەكان دابین كراوە.
سەرچنار ئەحمەد، بڕیاردەری فراكسیۆنی یەكگرتوو لە پەڕلەمانی كوردستان بۆ (خەڵك) ڕایگەیاند، ئێستا خەڵكی دەڵێن شتێك نەماوە بەناوی حكومەت، چونكە دەبینن ڕێكخراوە خێرخوازییەكان ڕۆژانە بەم بەفر و سەرمایە نەوت و سووتەمەنی كۆدەكەنەوە و بەسەر ماڵە هەژارو نەدارەكاندا دابەشی دەكەن، ئەگەر حكومەت هەبێت چۆن دەبێت خەمساردبێ و گوێ بەژیانی هاووڵاتیانی نەدات؟
ڕاشیگەیاند، دەبینین گرفتی بێ غازی و بێ نەوتی و بێ سووتەمەنی تابێت درێژەی دەبێت و حكومەتیش لەبری لێپرسینەوە لەوەزیری سامانە سروشتییەكان دەستخۆشی لێدەكات لەسەر خوێندنەوەی ڕاپۆرتێك، كە نەوتی دابەش كردووە بەسەر شار و شارۆچكەكانی هەرێمی كوردستادا، كە دەبوایە هەر بەپێی ئەو ڕاپۆرتە لێپرسینەوە لەوەزیر بكرایە نەك دەستخۆشی، چونكە تا ئێستا نیوە زیاتری شارەكانی هەرێم نەوتی سپیان وەرنەگرتووە و لە 258 ملێون لیتر تا ئێستا 68 ملیۆن لیتر نەوت دابەشكراوە، ئەوە باسی بەنزین و گرانبوونی هەر بەردەوام و بێ چارەسەرە.
ئاماژەی بەوەشكرد، ئێستا بەهۆی سەرما و بەفرەوە پاككردنەوەی ڕێگاكانیش هەر خێرخوازان دەیكەن و حكومەت باكی بەوەش نییە.
وتیشی، “نەبوونی ئاو و كارەباش ئەوەندە باسكراوە حكومەت لەبری زیادكردنی ئەمپێری كارەبا، بەسیستەمی پێوەری زیرەك بڕی پێدانی كارەبای لە 40 ئەمپێرەوە كەمكردەوە بۆ 30 ئەمپێر بەبێ گوێدانە خواستی هاووڵاتیان، ئەوەی ماوە بڵێین دابەشكردنی مووچەیە، كە لە 25 مانگ دەستپێدەكات و كۆتاییەكەی دیارنیە و بەندە بە 200 ملیارەكەی بەغدادەوە”.
ئەو پەڕلەمانتارە جەختیشی كردەوە، هەرێمی كوردستان یان خێرخوازان یان كەرتی تایبەت بەڕێوەی دەبات ئەمەش پاش 30 ساڵ ئەزموونی حوكومڕانی!
