سەردێر

بەفر دەگاتە نێوەندی هەولێر و گەرمیان

خەڵك

بەپێی پێشبینییەكانی كەشوهەوا ئێوارەی رۆژی چوارشەممە لەنێوەندی شاری هەولێر پایتەختی هەرێمی كوردستان بەفر دەبارێت.

لە شەوی رابردووەوە شەپۆلێكی چڕی بەفربارین لە هەرێمی كوردستان دەستیپێكردووە و تەواوی ناوچە شاخاوی و كوێستانییەكانی گرتووەتەوە و زۆرێك لە رێگاوبانەكانیش ئاستەنگ بوون.

بەپێی پێشبینییەكانی كەشناسی ئەم شەپۆلە بۆ رۆژانی داهاتوو بەردەوامی دەبێت و پێشبینی دەكرێت ئێوارەی ئەمڕۆ و بۆ شەوەكەی بگاتە بەشێك لە نێوەندی شارەكان لەوانە سلێمانی و هەڵەبجە و رانیە.

هاوكات پێشبینی دەكرێت رۆژانی داهاتوو بەفر بگاتە گەرمیان و رۆژی چوارشەممەش بگاتە نێوەندی شاری هەولێر.

بەڕێوەبەرایەتی كەشناسی و بەڕێوەبەراتییەكانی هاتووچۆ هۆشداری دەدەن بە شۆفێران و هاووڵاتیان تا دەكرێت هاتووچۆ كەمبكەنەوە، هاوكات ئەوانەشی زۆر پێویستیان بە چوونەدەرەوەیە رێوشوێنی تایبەت و خۆپارێزی توند بگرنەبەر.

چاوەڕێدەكرێت لەگەڵ شەپۆلە بەهێزەكەی بەفرباریندا سەرمایەكی توندیش بێت، بەجۆرێك لەهێندێك ناوچە پلەكانی گەرما بۆ 15 پلەی ژێر سفری داببەزن.