سەردێر

مالكی جارێكی دیكە هەڵبژێردرایەوە

خەڵك-
نوری مالكی، سەرۆكی هاوپەیمانی دەوڵەتی یاسا و ئەمینداری گشتی حزبی دەعوەی شیعەكان جارێكی دیكە بە ئەمینداری گشتی هەڵبژێردرایەوە.

حزبی دەعوەی ئیسلامی، كە بە گەورەترین حزبی شیعەكانی عێراق دادەنرێت لە ساڵی 1957 دامەزرێنراوە و یەكێك لە دامەزرێنەرانی (محەمەد باقر سەدر) بوو، كە لەلایەن سەدام حسێن-ەوە لەسێدارە درا و لەدوای ساڵی 2003وە، كە ڕژێمی سەدام حسێن ڕووخا سەركردەكانی ئەو حزبە سەرۆكایەتی حكومەتی عێراقیان كۆنتڕۆڵ كردووە.

ئەمڕۆ شەممە 15ی كانوونی دووەمی 2022، لە شاری نەجەف بە دروشمی (بە ناسنامەی ئیسلامییەوە روبەڕووی ئاڵنگارییەكان دەبینەوە‌و نیشتمان بنیاد دەنێین) كۆنگرەی 18ی حزبی دەعوە ئەنجام درا و نوری مالكی بە ئەمیندار هەڵبژێردرایەوە.

نوری مالكی لە ساڵی 2006ەوە بووە بە ئەمینداری گشتی حزبەكە، بەڵام بەهۆی ناكۆكییەكانی ناو ماڵی شیعە، هەریەكە لە ئیبراهیم جەعفەری و حەیدەر عەبادی لەو حزبە جیابوونەوە.