سەردێر

پۆلیس وردەكاری دەستگیركردنی 179 ژن و پیاو لە یانەیەكی شەوانە ئاشكرادەكات

خەڵك-
بەڕێوەبەرایەتی پۆلیسی پارێزگای هەولێر وردەكاری داخستنی یانەیەكی شەوانە و دەستگیركردنی ژمارەیەك ژن و پیاو ئاشكرادەكات و ڕایدەگەیەنێت، ماددەی هۆشبەر و كەرەستەی قەدەغەكراو و چەندین جۆر حەب دەستی بەسەرداگیراوە.

بەڕێوەبەرایەتی پۆلیسی پارێزگای هەولێر لە ڕاگەیەنراوێكدا ئاماژەی بەوەكردووە، لە چوارچێوەی بڕیارەكانی وەزارەتی ناوخۆ و پارێزگای هەولێر بۆ ڕێكخستنی یانەكانی شەوانە، دوای كۆكردنەوەی زانیاریی تەواو بە بوونی شوێنێك لەناو شاری هەولێر كەوا چەندین كاری نایاسایی و دوور لە ڕێنماییەكان و بەدەر لە ئادابی گشتی و پێچەوانەی یاسا و ڕێساكانی تێدا ئەنجام دەدرێت.

ڕاشیگەیاندووە، هێزەكانی بەڕێوەبەرایەتی پۆلیسی پارێزگای هەولێر، بە هەماهەنگی لەگەڵ ئەنجوومەنی ئاسایشی هەرێمی كوردستان، دوێنێ درەنگانی شەو تاكو بەرەبەیان لەو شوێنە (102) پیاو و (77) ئافرەت دەستگیر كران و هەروەها خاوەنی شوێنەكەش دەستگیر كرا.

ئاشكراشی كردووە، دەست بەسەر بڕێكی زۆر كەلوپەلی بەكارهێنانی ماددەی هۆشبەر و كەرستەی قەدەغەكراو و جۆرەها حەبدا گیرا.

جەختیشی كردۆتەوە، پەڕاوی لێكۆڵینەوە بۆ تۆمەتبارەكان كرایەوە و لە كاتی ئێستادا تۆمەتباران بەپێی بڕیاری دادوەر ڕاگیراون و ئەم هەڵمەتەش لەلایەن بەڕێوەبەرایەتی پۆلیسی پارێزگای هەولێر بەردەوام دەبێت.