سەردێر

دابەشكردنی 6 ماددەی بەشەخۆراك ڕاگەیەنرا

خەڵك-
وەزارەتی بارزگانی عێراق ڕایدەگەیەنێت، كە دەستیان كردووە بە دابەشكردنی یەكەمین سەبەتەی بەشەخۆراكی ئامساڵ و سەبەتەی خۆراكییەكەش لە 6 ماددە پێكهاتووە.

وەزارەتی بارزگانی عێراق لە ڕاگەیەنراوێكدا ئاماژەی بەوەكردووە، ئامادەكاری تەواو بووە بۆ دابەشكردنی یەكەمین سەبەتەی خۆراكی لەمساڵدا و دەروازەیەكی نوێی سنووری بۆ وەرگرتنی ماددەكانی بەشەخۆراك كراوەتەوە.

ئەندازیار لما هاشم موسەوی، بەڕێوەبەری گشتی كۆمپانیای بازرگانی خۆراك ڕایگەیاندووە، ئەو دەروازە سنوورییە نوێەی كراوەتەوە تایبەت دەبێت بە وەرگرتنی ماددەكانی چوارچێوەی سەبەتەی خۆراكی تاوەكو ماددەكان بەشێوەیەكی خێرا و باش بگەن بەدەستیان.

ئاماژەی بەوەشكردووە، سەرجەم گرێبەستەكانی وەبەرهێنانیان چالاك كردۆتەوە بەمەبەستی ڕەخساندنی هەلی وەبەرهێنانی نوێ‌ لە سەرجەم بەشەكانی كۆمپانیا، كە بەهۆیەوە داهات و سوودی ماددی بۆ كۆمپانیا و فەرمانبەرانمان دەبێت.

لای خۆشیەوە، شەوكەت محەمەد، بەڕێوەبەری كۆمپانیای دابەشكردنی خۆراك لە سلێمانی بە (خەڵك)ی ڕاگەیاند، بەردەوامین لە دابەشكردنی سەبەتەی خۆراكی و ماددەكانی ناو بەشەخۆراكیش پێكهاتوون لە (برنج و شەكر و زەیت و فاسۆلیا و لەتكەنۆك و دۆشاو).