سەردێر

ماوەی 8 مانگە خاوەن زەوییەكانی 8ی حەسارۆك چاوەڕێی بەڵێنەكەی حكومەتن

خەڵك-
دوای زیاتر لە 8 مانگ تێپەڕبوون بەسەر بەڵێنەكەی سەرۆكی حكومەتی هەرێم، كەبەر لەجەژنی ڕەمەزانی ساڵی ڕابردوو بەخاوەن زەوییەكانی 8ی حەسارۆكیدا، كە وێڕای پێدانی مۆڵەت بەدروستكردنی خانوو، خزمەتگووزاریش بە زەوییەكان بگەیەنرێت، بەڵام تائێستا هیچ خزمەتگوزاریەك بۆ زەوییەكان نەهاتووە، خاوەن زەوییەكانیش بڕیاریانداوە جارێكی تر گردبوونەوە ئەنجام بدەن.

سەركەوت عومەر، یەكێك لەخاوەن زەویەكانی 8ی حەسارۆك بە(خەڵك)ی ڕاگەیاند، دوای نزیكەی ۱۷ ساڵ چاوەڕوانی دواجار سەرۆكی حكومەت ڕۆژێك پێش جەژنی ڕەمەزان لەسەر زەوییەكانی 8ی حەسارۆك بەڵێنیدا دوای جەژنی ڕەمەزان ڕاستەوخۆ خزمەتگوزاری بۆ گەڕەكەكە بێت و مۆڵەت بدرێت بەدروستكردنی خانوو، پرسەكەشی سپارد بەپارێزگا رو وەزیری شارەوانی، بەڵام بەداخەوە دوای زیاتر لە 8 مانگ ئەوانەی بەرپرسن بەهێنانی خزمەتگووزاری بەڵێنەكەی سەرۆكی حكومەتیان جێبەجێ نەكردووە و ڕێگاش نەدراوە خاوەن زەوییەكان خانوو دروست بكەن.

دەشڵێت: “8ی حەسارۆك كە ١٦ هەزار و ٥٠٠ پارچە زەوییە، خاوەنەكانیان چاوەڕوانی ئاوەدانكردنەوەی زەویەكانیانن، ئومێدێكیان بۆ دروست بوو، كەسەرۆكی حكومەت بەڵێنی پێدان، بەڵام بەداخەوە جارێكی تر خاوەن زەوییەكان بێ هیوابوون، بۆیە بڕیارمانداوە بە ھۆكاری ئەوەی تاكو ئێستا ھیچ كارێك نەكراوە بۆ زەویەكانمان و ناشزانین كەی بۆمان دەكرێ و كەی خزمەتگوزاری دابین دەكرێ و چارەنووسی ئەو زەویانەمان چی لێ دێت سێ شەممەی داهاتوو ڕێكەوتی ١٨/١/٢٠٢٢ كاتژمێر ١٠ ی بەیانی لە بەردەم ئەنجوومەنی وەزیران گردبوونەوە دەكەین.

ئەوەش دەخاتەڕوو، سوپاسی هەر لایەنێك دەكەن پشتگیریان دەكات بۆ دابینكردنی خزمەتگوزاری، چونكە بێزاربوون لەبەڵێنی بێكردار، هەموو بیانووەكانیشیان بۆ نەهێنانی خزمەتگوزاری دەگەڕێنەوە گوایە قەیرانی دارایی هەیە، بەڵام سەیربكەی بەهەزاران پارچە زەوی، كە بەشێكیان لەم یەك دوو ساڵە دابەشكراون خزمەتگوزاری تەواویان بۆ دابینكراوە، چونكە بەرپرس و كوڕی بەرپرسان پڕۆژەیان لەسەر كردووە.

ئاماژە بۆ ئەوەش دەكات، هۆكارێكی تری نەهێنانی خزمەتگوزاری دەگەڕێتەوە بۆ ئەو هەموو شووقە نیشتەجێیانەی دروستكراون، بەهێنانی خزمەتگوزاری بۆ 8ی حەسارۆك بازاڕی شووقەكانیان نامێنێ و نرخەكانیشیان زۆر دادەبەزێت.