سەردێر

بازرگانێك دەیەوێت نرخی بەنزین لە سلێمانی هەرزان بكات

خەڵك-
ئەنجوومەنی پارێزگای سلێمانی ئاشكرای دەكات، كە چەند بازرگانێك ئامادەن نرخی بەنزین لە سلێمانی بكەن بە 670 دینار و جەختیشدەكاتەوە، كە بۆ كێشەی غازی ماڵان حكومەت كەمتەرخەمە.

محەمەد ڕەسوڵ، سەرۆكی لیژنەی خزمەتگوزاری شارەوانی لە ئەنجوومەنی پارێزگای سلێمانی بۆ (خەڵك) ڕایگەیاند، بەشداریمان لە كۆبوونەوەی لیژنەی پیشەسازی و وزە كرد سەبارەت بە دابەشكردنی نەوتی سپی ماڵان، كە ئەمساڵ وەزارەتی سامانە سروشتییەكان بڕیاریان دابوو دابەشی بكەن، بەڵام تاكو ئێستا ڕێژەیەكی زۆر كەم دابەش كراوە لە سنووری پارێزگای سلێمانی و ئیدارەی ڕاپەڕین كە زۆرینەی ھاووڵاتیان وەریان نەگرتووە و بۆ ئەو مەبەستە نووسراو ئاڕاستەی وەزارەت دەكەین.

ڕاشیگەیاند، سەبارەت بە گرفتی كەمبونەوەی غازی ماڵان، كەساڵانە لەمانگی یەك و دوودا سەرهەڵدەدات و حكومەت كەمتەرخەمە لە چارەسەركردنیدا بەنووسراو لایەنی پەیوەندیدار ئاگادار دەكەینەوە.

وتیشی، “لە كۆبوونەوەكەدا گوێمان لە بازرگانێكی بواری سووتەمەنی گرت، ئەوەی ڕاگەیاند، كە دەتوانن بەنزین بەو پێكهاتەیەی لە سنووری پارێزگای هەولێر و دهۆك، كە بە ٦٩٠ دینار دەفرۆشرێت، ئەوانیش دەتوانن لیتری بە ٦٧٠ دینار بۆ ئەم سنورە دابین بكەن، بۆ ئەو مەبەستە لە نزیكترین كاتدا لەگەڵ لایەنە پەیوەندیدارەكاندا كۆدەبینەوە”.