سەردێر

هەولێر لە نەورۆزی بردەوە و نەوتی میسانیش لە بەسرە

شورتە لە یەكەمی ڕیزبەندییەكەدا مایەوە

خەڵك-
یارییەكانی گەڕی 20ی خولی نایابی عیراق دەستیپێكرد و ئەمڕۆ دوو شەممە چەند یارییەك بەڕێوەچوون.

لە یاریی یەكەمدا كە لە یاریگای دهۆك بەڕێوەچوو، یانەی هەولێر بە چوار گۆڵ بەرامبەر بە دوو گۆڵ لە یانەی نەورۆزی بردەوە، گۆڵەكانی هەولێریش لەلایەن شێركۆ كەریم لە خولەكی 6 و ڕەوا یوسف لە خولەكی 12 و یاسین سامیە دوو گۆڵ لە خولەكەكانی 27 و 65ی یارییەكە تۆماركران، دوو گۆڵەكەی یانەی نەورۆزیش لەلایەن یاریزان ئاسۆ ڕۆستەم لە خولەكەكانی 60 و 83 تۆماركران.

لە یاریی دووەمدا، نەوتی میسان بە چوار گۆڵ بەرامبەر بە یەك گۆڵ لە نەوتی بەسرەی بردەوە، یارییەكەش لە یاریگای میسان بەڕێوەچوو.

لە یاریی سێیەمیشدا كە لە یاریگەی سەناعە بەڕێوەچوو، بەبێ‌ گۆڵ هەردوو یانەی سەناعە و نەوتی وەسەت یەكسان بوون، هەر لە گەڕی بیستدا ئەمڕۆ یانەی شورتە و نەجەف لە یاریگەی نێودەوڵەتی شەعب ڕووبەڕووی یەك بوونەوە و یانەی شورتە توانی بە گۆڵێكی بێ‌ بەرامبەر یارییەكە بباتەوە و خۆی لە ڕیزبەندی یەكەمی خولی نایابی عیراقدا زیاتر قایم بكات.