سەردێر

شەپۆلێكی باران و بەفر بە دوو قۆناغ هەرێم دەگرێتەوە

خەڵك-
شەپۆلێكی بارانبارین و بەفر بارین لە سبەی دوو شەممەوە بە دوو قۆناغ ناوچەكانی هەرێمی كوردستان دەگرێتەوه.

محەمەد كەمال، شارەزای كەشناسی بۆ (خەڵك) ئاماژەی بەوەكرد، لە قۆناغی یــەكــەمدا پێشبینی دەكرێت لەسبەینێ پێشنیوەڕۆ بارانبارین دەست پێبكات بەهۆی هاتنی نزمە پەستانی دەریای ناوەڕاستەوە، سەرەتاش لەسنوری دهـۆك و مـوسڵ دەست پێدەكات بەتیپەڕبونی كات و نزیك نیوەڕۆی سبەی شەپۆلەكە فراوان دەبێت و ناوچەكانی سنوری پارێزگای هەولێر و كەركوك و ڕانیە و ڕاپەڕین و مەخمور دەگرێتەوە دواتر بۆ ناوچەكانی سنوری پارێزگای سلێمانی و هەڵەبجە و ئیدارەی گەرمیان و تا ئێوارەی ڕۆژی چوار شەممە بەردەوام دەبێت.

ڕاشیگەیاند، هەندێك جار تاوە بارانی باش دەبارێت و هەندێك جار باران دەوەستێ و كۆی گشتی ڕێژەی بارانبارین لەم قۆناغەدا 5 تاكـو 17 ملم دەبێت و پلەكانی گەرماش 5 پلە نزم دەبنەوە و ئەگەری بەفر بارینیش هەیە لە ناوچە شاخاویەكان.

سەبارەت بە قۆناغــی دووەم ئاماژەی بەوەكرد، پێشبینی دەكرێت بڕێك ڕێژەی باشی شێ لەدەریای سورەوە بگاتە ناوچەكە و لەگەڵ نزمە پەستانی دەریای ناوەڕاست یەكبگرن و شەپۆلی بەهێز دروست بكەن، هەربۆیە كاریگەریەكەی لەنزیك درەنگانێكی شەوی چوار شەممە دەردەكەوێت و تانیوەڕۆی پێنج شەممە لەزۆربەی ناوچەكان بارانی باش و هەندێ جار بەخوڕ دەبارێت و لافاو دروست دەبێت.

محەمەد كەمال دەڵێت: “پێویستە لەسەر هاووڵاتیان و تیمی بەرگری شارستانی ئامادەكاری پێشوەختە بكەن و سەرە مەنهۆڵەكان لابرێت بۆئەوەی دیسان ئاوێكی زۆر بەناكاو نەیەتەوە گەڕەكەكان بەتایبەتیش سنووری هەولێر و ڕاپەڕین و سلێمانی و دووكان و باكوری گەرمیان”.

ئەو شارەزایەی كەشناسی ڕوونیشی كردەوە، تا 18ی ئەم مانگە واتا سێ شەممە بارانبارین بەشێوەی ناوبەناو بەردەوامی هەیە بەهۆی مانەوەی شێ و شكانی بەرزە پەستان ڕۆژانە ئەگەری بارانبارین هەیە لەسەر ناوچەكانمان و كۆی گشتی ڕێژەی بارانبارین لە قۆناغی دووەمدا لەنێوان 20 ملم بۆ 60 ملم دەبێت و چەقی شەپۆلەكەش بەپێی نوێترین گۆڕانكاری دەكەوێتە باكوری خۆرهەڵاتی هەرێمی كوردستان و بەفریش تەنیا لەچیا بەرزەكان دەبارێت.