سەردێر

بەفر رێگای سەدان ناوچەی باكووری كوردستانی داخست

خەڵك

لە هەردوو پارێزگای وان و بەدلیس بەهۆی خراپی كەشوهەواوە رێگای ٢٩٦ ناوچەی نیشتەجێبوون داخراون.

شارەوانی وان لەو بارەیەوە راگەیەندراوێكی بڵاوكردووەتەوە و تێیدا ئەوەی خستووەتەڕوو كە بەهۆی بەفرەوە رێگای ٢٨٧ ناوچەی نیشتەجێبوون داخراوە و تیمەكانی شارەوانی ماوەی سێ رۆژە لە هەوڵی كردنەوەی رێگاكاندان.

ئاژانسی ئانادۆڵۆ بڵاویكردەوە، بەهەمان شێوە لە پارێزگای بەدلیسیش بەفر رێگای چەند گوندێكی داخستووە و لەو بارەیەشەوە بەڕێوبەری خزمەتگوزارییەكانی رێگاوبانی شارەكە، ئومیت كورتكان، ئەوەی خستەڕوو كە تیمەكانی شارەوانی لە هەوڵی كردنەوەی رێگای نۆ گونددان كە بەهۆی بەفرەوە داخراون.

تیمەكانی شارەوانی، لە ناوەندی پارێزگاكە و شارۆچكەكاندا بەفری سەر شەقامكان رادەماڵن، تاوەكو ئاستەنگ بۆ كار و ژیانی هاووڵاتییان دروست نەبێت.