سەردێر

لە یەختە نقومبووەكەی دەریای ئیجە 30 كۆچبەری كورد بێسەروشوێنن

خەڵك-ئارام سەردار
نوێنەری كەسوكاڕی بێ سەرووشوێنانی دەریای ئیجە داوا لە حكومەت و پەڕلەمانی كوردستان دەكات سۆراغی كەسوكاریان بكەن و دەشڵێت: “لە یەختە نقومبووەكەی شەوی 22ی مانگی ڕابردوو 30 كۆچبەری كورد بێسەروشوێنن”.

هیمداد جەوهەر، نوێنەری كەسوكاڕی بێ سەرووشوێنانی دەریای ئیجە بە(خەڵك)ی ڕاگەیاند، ئەمڕۆ لەیاداشتێكدا كەئاڕاستەی سەرۆكی پەڕلەمانی كوردستانمان كردوە داوامان كردوە لەڕێگەی حكومەت و فەرمانگەی پەیوەندیەكانی دەرەوە سۆراغی بێ سەرووشوێنانمان لە دەریای ئیجە بۆ بكەن.

دەشڵێت: “لەشەوی ٢١\٢٢ی كانوونی یەكەمی ٢٠٢١ یەختێك كە ٦١ كۆچبەری هەڵگرتووە لەسنووری یۆنان لەدەریای ئیجە نزیك ناوچەی سێپەنجە پەكی دەكەوێت و تەنها ١٣ كۆچبەر ڕزگاریان بوو، بەڵام ئەوانەی تر تائێستا بێ سەرووشوێنن و هیچ سۆراغێكیان نیە”.

ڕوونیشی كردەوە، لە ٤٨ كۆچبەرە ٣٠ كۆچبەر كوردن، بۆیە داوا لە حكومەت و پەڕلەمان دەكەین هەوڵی خۆیان بخەنەگەڕ لەڕێگەی كونسوڵخانەی یۆنان، سۆراغی بێ سەرووشوێنانمان لە دەریای ئیجە بۆ بكەن.