سەردێر

كتێبێك دەربارەی مەسعود بارزانی لە ئەمریكا، پلەی یەكەمی بەدەستهێنا

خەڵك-

كۆمپانیایەكی ئەمەریكی پێشبڕكێی بۆ یەك ملیۆن پەرتووك بەڕێوەبرد و پەرتووكی نووسەرێكی كورد، بەناونیشانی ”لەسەر لێوارەكانی ئازادی.. مەسعود بارزانی كوردستانی بردە لێوارەكانی سەربەخۆیی” خەڵاتی یەكەمی وەرگرت.

داڤان یەحیا خەلیل نووسەری پەرتووكەكه به میدیای پارتی ڕاگەیاند، پەرتووكەكەم لە سەردەمی ڕیفراندۆم ئامادەكردووە و لە زۆربەی وڵاتانی جیهان و ئەمەریكا و ئەوروپا لەبەردەستە و بە زمانی ئینگلیزی ئامادەكراوە و ٢٤٢ لاپەڕە لەخۆدەگرێت و لە كۆتایی ساڵی ٢٠٢٠ چاپ كراوە كە ناوەڕۆكی پەرتووكەكە ئاماژە بەو فاكتەرانە دەكات كەوا بوونەتەهۆی ئەوەی مەسعود بارزانی داوای ڕیفڕاندۆمی سەربەخۆیی بكات.

وتیشی”لەلایەن كۆمپانییەكی ئەمەریكییەوە پێشبڕكێیەك بۆ پەرتووك ئامادە كرابوو، بەندەش وەك نووسەرێكی كورد بەشداریی پێشبڕكێی كۆمپانیا ئەمریكییەكەم كرد كە هەموو ساڵێك زیاتر لە یەك ملیۆن ناونیشان بەشداری لە پێشبڕكێیەكەدا دەكەن، بۆ ئەمساڵیش ئاگادار كرامەوە پەرتووكەكەم خەڵاتی یەكەمی پێشبڕكێیەكەی بردووەتەوە”.

ئاشكراشیكرد، بۆ جاری یەكەمە پەرتووكێكی كورد لە پێشبركێیەكی جیهانیدا خەڵاتی یەكەم بەدەست دێنێت، ئەوەش جێگەی ئومێدە بۆ منی نووسەر كە بتوانم لەو ڕێگەیەوە خزمەتی میللەتی خۆم بكەم، بەتایبەتی پەرتووكێك لەسەر دۆزی كورد و سەربەخۆیی نووسرابێت، شانازیی پێوە دەكەم.