سەردێر

لە چەند پارێزگایەك سبەینێ‌ كرا بە پشوو

خەڵك-
بەبۆنەی یادی كوژرانی قاسم سولەیمانی و ئەبو مەهدی موهەندیس لەلایەن هێزی ئاسمانی ئەمریكاوە، ژمارەیەك پارێزگای عێراق (زیقار و بابل و بەسڕە) سبەینێ‌ دەكەن بە پشوو.

محەمەد هادی، پارێزگاری زیقار لە بەیاننامەیەكدا ئاماژەی بەوەكردووە، سبەینێ‌ دوو شەممە 3ی كانوونی دووەم بەبۆنەی “شەهیدانی سەركردەی سەركەوتن” دەكرێتە پشووی فەرمی.

لای خۆشیەوە، حەسەن مەندیل، پارێزگاری بابل لە بەیاننامەیەكدا ڕایگەیاندووە، سبەینێ‌ دوو شەممە دەكرێتە پشووی فەرمی، بەڵام فەرمانگە ئەمنی و خزمەتگوزارییەكان ناگرێتەوە.

ڕاشیگەیاندووە، ئەو پشووە هاوكاتە لەگەڵ یادكردنەوەی بەئازاری ڕووداوەكەی فڕۆكەخانە (كوژرانی سولەیمانی و موهەندیس) و هەروەها ئەو ڕووداوە ئازاربەخشەی بەر خەڵكەكەمان لە شارەدێی جەبلە كەوتووە.

هاوكات، پارێزگاری بەسڕە لە بەیاننامەیەكدا ئەوەی خستۆتەڕوو، سبەینێ‌ دوو شەممە لەتەواوی پارێزگاكە دەبێتە پشووی فەرمی بەهۆی یادی كوژرانی ئەبو مەهدی موهەندیس و قاسم سولەیمانی.

لە بەرەبەیانی 3-1-2020دا و دوو ساڵ لەمەوبەر لە هێرشێكی فڕۆكەی بێ‌ فڕۆكەوانی ئەمریكا بۆ سەر كاروانی ئۆتۆمبێلەكانی قاسم سولەیمانی، فەرماندەی فەیلەقی قودسی ئێران و ئەبو مەهدی موهەندیس، سەركردەی حەشدی شەعبی لە نزیك فڕۆكەخانەی بەغدا، ئەو بەرپرسە باڵایانە و چەند پاسەوانێكیان كوژران و ئەمریكاش بەرپرسیارێتی خۆی لە كردەوەكە ڕاگەیاند.