سەردێر

كۆمسیۆن ناوی پەڕلەمانتارانی نوێی ڕەوانەی سەرۆك كۆمار كرد

خەڵك-
كۆمسیۆنی بالای سەربەخۆی هەڵبژاردنەكانی عێراق ئەنجامی كۆتایی هەڵبژاردنە پەڕلەمانییەكەی مانگی ئۆكتۆبەری ڕابردووی ڕەوانەی سەرۆكایەتی كۆمار كرد بۆ پەسەندكردنی.

كۆمسیۆنی باڵای سەربەخۆی هەڵبژاردنەكانی عێراق بە نووسراوێك، كە دەست (خەڵك) كەوتووە، ئەنجامی كۆتایی هەڵبژاردنە پەڕلەمانییەكەی 10ی ئۆكتۆبەر و لیستی ناوی پەرلەمانتارە نوێیەكانی ڕەوانەی سەرۆكایەتی كۆمار كرد بۆ پەسەندكردنی.

وەك لە نووسراوەكەدا هاتووە، “ئەنجامی هەڵبژاردنەكە لەلایەن دادگای فیدڕاڵییەوە پەسەند كراوە” و داوا لە سەرۆك كۆمار دەكات بەپێی دەستوور لەماوەی 15 ڕۆژدا لە بەرواری پەسەندكردنی ئەنجامەكانەوە پەڕلەمانی نوێ‌ ڕابسپێرێت بۆ كۆبوونەوە.

لەگەڵ نووسراوەكەی كۆمسیۆندا هاوپێچی ناوی كاندیدە دەرچووەكان كراوە، كە ژمارەیان 329 كەسە و دوای كۆبوونەوەی پەڕلەمان و سوێندی یاسایی وەك پەڕلەمانتار لە خولێكی دیكەی پەڕلەمان دەستبەكاردەبن.