سەردێر

هەسەدە؛ بەرپرسێكی باڵای داعش دەستگیركرا دەستی هەبووە لەكوشتنی سەدان هاووڵاتی

خەڵك –
هێزەكانی سوریای دیموكرات (هەسەدە) ڕایدەگەیەنێت، بە هاوكاری یەكینەكانی دژە تیرۆر (YAT) بەرپرسێكی باڵای داعشیان دەستگیركرد، كە دەستی هەبووە لەكوشتنی بەكۆمەڵی سەدان هاووڵاتی بەتایبەتی لە میانەی شەڕی كۆبانێ لە ساڵی 2014.

نووسینگەی ڕاگەیاندنی هێزەكانی سوریای دیموكرات (هەسەدە) ڕۆژی یەكشەممە ڕایگەیاند، یەكینەكانی دژە تیرۆر (YAT) بە پشتیوانی هێزی هاوپەیمانان ڕێبەرێكی داعشیان دەستگیركرد، دەستی هەبووە لە كوشتنی بەكۆمەڵی سەدان كەس بەتایبەتی لە میانەی شەڕی كۆبانێ لە ساڵی 2014 ، بە ناوی محەمەد ئەلعوبێد ئەلعەوەیدە كە بە ناوی ئەلڕەشید ناسراوە.

بە پێی گرتەیەكی ڤیدیۆیی كە لەلایەن هەسەدەوە بڵاوكراوەتەوە ئەلڕەشید بەرپرس بووە لە پلانە شكستخواردووەكەی هێرشكردنە سەر زیندانیانی حەسەكە، كە هەزاران زیندانی داعشی تێدایە.

بەپێی زانیارییەكانی ڕەشید لە گرتە ڤیدیۆییەكەدا ئاشكرای كردووە، پلانی هێرشەكەی سەر ئەو زیندانە بە دوو ئۆتۆمبێلی مینڕێژكراو و هەشت خۆكوژ و 165 چەكی كیلانشیكۆف ئامادەكراوبوو.

ئەمە لەكاتێكدایە ، كە ئۆپەراسیۆنی دژە تیرۆری هەسەدە و هێزی ئاسایشی ناوخۆیی بە پشتیوانی هێزی هاوپەیمانانی نێودەوڵەتی لە هەشتی مانگی 11 لە ناوچەی ئەبو خەشەب، كە دەكەوێتە نێوان دێرازۆر و ڕەققە لە دژی كۆمەڵێكی داعش كە پیلانی ئەو هێرشەیان بۆسەر گرتووخانەی حەسەكە دادەڕشت بەڕێوەچوو، ژمارەیەكیان تێدا كوژران و ژمارەیەكیش دەستگیركراون و ئەلڕەشید لەو كاتەدا توانیبووی هەڵبێت، بەڵام ئێستا لە ئۆپەراسیۆنێكی هەسەدەدا دەستگیر كرا.

Image