سەردێر

كەشناسی كاتی كۆتایی هاتنی شەپۆلی سەرما ئاشكرادەكات

خەڵك-
دەستەی گشتی كەشناسی عێراق كاتی كۆتایی هاتنی شەپۆلی سەرماوسۆڵە ئاشكرادەكات و ڕایدەگەیەنێت، لە بەشێكی پارێزگاكان پلەكانی گەرما بۆ پلەی بەستن دابەزیوون.

عامر جابری، بەڕێوەبەری ڕاگەیاندنی كەشناسی عێراق لە بەیاننامەیەكدا ئاماژەی بەوەكردووە، ئەم شەپۆلە سەرمایەی وڵاتی گرۆتەوە بۆ ماوەی 3 ڕۆژ بەردەوام دەبێت و ڕۆژی سێ‌ شەممە كۆتایی دێت.

ئاماژەی بەوەشكردووە، ئەم شەپۆلی سەرماوسۆڵەیە لە ئەنجامی یەكگرتنی دوو نزمە پاڵەپەستۆی دەریای سوور و دەریای ناوەڕاستە، كە بەشێوەیەكی بەهێز نزمە پاڵەپەستۆی سیبریا كاری كردۆتەسەری و بەهۆیەوە پلەكانی گەرمای بەشێوەیەكی بەرچاو دابەزاندووە.

ڕاشیگەیاندووە، ئەم نزمە پاڵەپەستۆیە هەموو ساڵێك لە مانگی كانوونی یەكەمدا وڵات دەگرێتەوە و لە بەشێكی زۆری ناوچەكانی هەرێمی كوردستان و ناوەڕاستی وڵات پلەكانی گەرما هاتوونەتە ژێر سفری سەدی بۆ -4 پلە و لە بەغدا گەیشتۆتە سفر پلەی سەدی.

ئاشكراشی كردووە، لە ڕۆژی سێ‌ شەممەی ئەم هەفتەیەوە پلەكانی گەرما دەچنەوە ئاستی ئاسایی ساڵانە و لە هەردوو مانگەكانی 1 و 2ی ساڵی نوێدا شەپۆلی باران بارین زۆربەی ناوچەكانی وڵات بە هەرێمی كوردستانەوە دەگرێتەوە و لە ناوچە شاخاوییەكانی هەرێم بەفر دەبارێت.