سەردێر

سەدر لەبارەی دەستلەكاركێشانەوەی پارێزگاری نەجەف ڕاگەیەندراوێكی بڵاوكردەوە

داوای پاراستنی خۆی و خێزانەكەی دەكات

خەڵك-
موقتەدا سەدر ڕابەری ڕەوتی سەدر، خۆشحاڵی خۆی بەرانبەر بە دەستلەكاركێشانەوەی پارێزگاری نەجەف دەربڕی و داوای كرد، خۆی و خێزانەكەی لە هەر هەڕەشەیەك كە ڕووبەڕووی دەبێتەوە بپارێزرێت.

بەپێی ڕاگەیەنداوێك كە لەلایەن سەدرەوە بڵاوكرایەوە”دەستلەكاركێشانەوەی پارێزگاری نەجەف، هەنگاوێكە ڕووەو ئاراستەیەكی ڕاست.. ئەم هەنگاوەی بۆ ئەژماردەكرێت”.
بە وتەی ڕابەری ڕەوتی سەدر”پێویستە حكومەت خۆی و خێزانەكەی بپارێزێت لە هەر هەڕەشەیەك كە ڕووبەڕووی دەبێتەوە و بەپێی یاسا و ڕێسا كارپێكراوەكانیش مامەڵە لەگەڵ دەستلەكاركێشانەوەكەیدا بكرێت”.

ئەمڕۆ هەینی 24ی كانونی یەكەمی 2021، لوئەی یاسری پارێزگاری نەجەف، دەستلەكاركێشانەوەی خۆی لە پۆستەكەی ڕاگەیاند، ئەمەش لەكاتێكدایە كە پێشتر موقتەدا سەدر ڕابەری ڕەوتی سەدر لە دوای دەستلەكاركێشانەوەی پارێزگاریی زیقار، ئاماژەی بەو هەوڵانە كردبوو كە بۆ مەبەستی دەستلەكاركێشانەوەی پارێزگاری نەجەف دەیانخاتەگەڕ.