سەردێر

ئەنجوومەنی پارێزگای هەولێر لەبارەی وەرگرتنی 2 ملیارەکەی عیراق بڕیاریدا

پارێزگار سەرپشككرا

خەڵک-ئارام سەردار
ئەنجوومەنی پارێزگای هەولێر لەدانیشتنی نائاسایی خۆی بەدەنگی 16 ئەندام لەکۆی 17 ئەندامی بەشداربوو، پارێزگاری هەولێریان سەرپشک کرد لەوەی پارەکەی عیراق قبوڵ دەکات یان ڕەتی دەکاتەوە، سەرۆکی ئەنجوومەنەکەش دەڵێت، خێرخواز هەیە پارەی زیاتریان بۆ زیانلێکەوتووانی لافاوەکە تەرخانکردووە لەحکومەتی عیراق.
عەلى رەشید سەرۆکى ئەنجوومەنى پارێزگاى هەولێر لەکۆنفڕانسێکی ڕۆژنامەوانی ڕایگەیاند، فڕاکسیۆنی یەکێتی بەشداریان لەکۆبوونەوەکە نەکردوە، ژمارەیەک ئەندامیش ڕەخنەیان هەبووە لەسەر کۆبوونەوەکە دەست خۆشیان لێ دەکەین، بەڵام ئێمە لەکۆبوونەوەکە پرسی دیاری کردنی 2 ملیار دینار لەلایەن عیراق بۆ حکومەتی جێدەهێڵین کەوا بڕیاری کۆتایی بدات و بەدەنگی 16 ئەندام لەکۆی 17 ئەندامی بەشداربوو، پارێزگاری هەولێریان سەرپشک کرد لەوەی پارەکەی عیراق قبوڵ دەکات یان ڕەتی دەکاتەوە.
دەشڵێت، خێرخواز هەیە پارەی زیاتریان بۆ زیانلێکەوتووانی لافاوەکە تەرخانکردوە لەحکومەتی عیراق، پێویستە پارەی زیاتر تەرخانبکرێت.
باسی لەوەشکرد، جارێ لێکۆڵینەوە لەهۆکاری ڕووداوەکە دەکرێت، چونکە ڕەنگە لەناو خەڵک قسەیەک بکرێت و لەواقعدا شتێکی تر هەبێت، ئەو بەرپرسانەشی تۆمەتباردەکرێن کەهۆکاری ڕووداوەکە بووبن ڕەنگە ئەوانیش قسەی خۆیان هەبێت، لەبەر ئەوە بەپەلە ناتوانرێت بڕیار بدرێت.