سەردێر

ئەمڕۆ مانگرتنی سەرتاسەری لە ڕۆژهەڵاتی كوردستان بەڕێوەدەچێت

خەڵك-

ژمارەیەك چالاكی مەدەنی ڕۆژهەڵاتی كوردستان داوا لە خەڵكی شارە جیاجیاكانی ڕۆژهەڵاتی كوردستان دەكەن بەمەبەستی شەرەمەزاركردنی بەنهێنی لەسێدارەدانی حەیدەر قوربانی ئەمڕۆ پێنج شەممە لە ماڵەكانی خۆیان بمێننەوە و مانگرتنێكی گشتی بێزاری خۆیان نیشان بدەن.

ژمارەیەك چالاكی مەدەنی ڕۆژهەڵاتی كوردستان لە ڕاگەیەنراوێكدا ئاماژە بۆ ئەوە دەكەن، دەستی ڕەشی كۆماری سێدارە، جارێكی دیكە ڕۆڵەیەكی فیداكار و تێكۆشەری ئەم كوردستانەی لە بەرەبەیانێكی ڕەشدا و بەنهێنی بردەسەر سێدارە، لە سێدارەدانی “حەیدەر قوربانی” هەڵگری پەیامی بەردەوامی سەركوت و زەبروزەنگە لە لایەن دەسەڵاتی داگیركەری كۆماری ئیسلامیی ئێرانەوە.

ئاشكراشیدەكەن، ئەركی هەموو كوردێكە بە هەڵوێستێكی كوردانە و بەئیرادەیەكی حەیدەرئاسا و پۆڵایین، وەڵامی ئەم سەرەڕۆییەی كۆماری ئیسلامی ئێران بۆ شكاندنی ئیرادەی ئازادیخوازیی كورد بداتەوە، بۆیە ئێمە وەكو ژمارەیەك لە چالاكانی مەدەنی ناوخۆی ڕۆژهەڵاتی كوردستان داوا لە خەڵكی كوردستان دەكەین، بۆ دەربڕینی ناڕەزایی بەرانبەر بە لەسێدارەدانی “حەیدەر قوربانی” و ڕەتكردەوەی ئیرادەی زەبروزەنگ و خۆسەپاندن و ترس و تۆقاندن لە لایەن كۆماری ئیسلامیی ئێرانەوە، ئەمڕۆ پێنج شەممە مانگرتنێكی گشتی بەڕێوەببەن.

ڕوونیشیدەكەنەوە، چەندین ڕۆڵەی دیكەی كورد بەتۆمەتی سیاسی سزای سێدارەیان بەسەردا سەپاوە، ئێستا لە بەندیخانەكان چاوەڕوانی بەڕێوەچوونی سزاكەیان دەكەن، ئێمە دەتوانین بەهەڵوێستی خۆمان پێش بە لەسێدارەدانی ئەوان بگرین.

ئەو چالاكانە داواش لە حزب و ڕێكخراوە سیاسی و مەدەنییەكانی ڕۆژهەڵاتی كوردستان دەكەن بەهەر جۆرێك كە بۆیان دەلوێت پشتیوانی لەم مانگرتنە بكەن .