سەردێر

دەیان كۆچبەر لە دەریای ئیجەدا بیسەروشوێن بوون

خەڵك-
دەزگای لوتكە بۆ كاروباری ئاوارە و پەنابەران ئاشكرای دەكات، كە بەهۆی نقوم بوونی بەلەمێكی كۆچبەرانەوە لە دەریای ئیجە تەرمی كۆچبەرێك دۆزراوەتەوە و دەیان كۆچبەریش بێ‌ سەروشوێنن و 12 كەسیش ڕزگار كراون.

ئاری جەلال، سەرۆكی دەزگای لوتكە بۆ كاروباری ئاوارە و پەنابەران بۆ (خەڵك) ڕایگەیاند، درەنگانێكی شەوی سێ شەممە ڕێكەوتی ٢١/١٢/٢٠٢١، بەداخەوە لە ڕووداوێكی دیكەی دڵتەزێن لە كەناراوەكانی یۆنان لە نزیك دوورگەی فۆلیگاندرۆس- ئیجە بەلەمێكی كۆچبەران نقوم بوو، دەیان كۆچبەری بێسەروشوێنن.

وتیشی، “شێخ حسێن حەمەساڵح، نوێنەری دەزگای لوتكە لە وڵاتی یۆنان لەگەڵ لایەنی پەیوەندیداری یۆنانی و باڵیۆزخانەی عێراق ئەوەی پشتڕاست كردەوە، كە ١٢ لە كۆچبەرەكان ڕزگاركراون، كە ٧ لەو كەسانە عیراقین و لە ئێستادا لە نەخۆشخانەنی دوورگەی سانتۆرینی یۆنانن”.

ئاشكراشی كرد، یەك تەرم دۆزراوەتەوە و ژمارەیەكی دیكە بێسەروشوێنن.

ئەمە لەكاتێكدایە، كە پاسەوانی كەناراوەكانی یۆنان ڕایانگەیاندووە، تا ئێستاش گەڕان بەدوای بیسەروشوێن بووەكان بەردەوامە و چوار كەشتی پاسەوانی كەنارەكان و دوو هەلیكۆپتەر لە هێزی دەریایی و ئاسمانی و فڕۆكەیەكی گواستنەوەی سەربازی لەم ئۆپەراسیۆنی گەڕان و ڕزگاركردندا بەشدارییان كردووە.