سەردێر

ڕێكخراوی لێبوردنی نێودەوڵەتی لەسەر كۆچبەران هاتەدەنگ

پێیوایە پۆڵەندا یاسا نێودەوڵەتییەكان پێشێل دەكات

خەڵك-
ڕێكخراوی لێبوردنی نێودەوڵەتی، ڕەخنە لە مامەڵەی توندی دەسەڵاتدارانی پۆڵەندا دەگرێت لەگەڵ كۆچبەران كە هەوڵی پەڕینەوە دەدەن لە سنورەكانی بیلاڕوسەوە بەرەو پۆڵەندا.

بەپێی بەیاننامەیەك كە ئەمڕ‌وۆ دوو شەممە لەلایەن ڕێكخراوەكەوە بڵاوكرایەوە”سوپای پۆڵەندا بەشێوەیەكی نایاسایی پەنابەرانی دەركردووە لە وڵاتەكەیەوە بەرەو نێو خاكی بیلاڕوس، بیبەری تون و كوتەكی لەدژی كۆچبەران بەكارهێناوە”.

هەر لە بەیاننامەكەدا هاتووە”پۆڵەندا بەشێوەیەكی ئاشكرا یاسا و پێوەرە نێودەوڵەتییەكان پێشێل دەكات، بە قەدەغەكردنی ئەشكەنجەدان و ئەوانی تر لەڕێی مامەڵەی خراپی لەگەڵ كۆچبەران”.

ڕێكخراوی لێبوردنی نێودەوڵەتی دەڵێت”هەموو ئەو كۆچبەرانەی قسەیان لەگەڵ كردوون، جگە لە یەكێكیان، باسیان لەوەكردووە كە بەبێ‌ ڕەچاوكردنی ڕێكارە یاساییەكان بۆ بیلاڕوس دیپۆرتكراونەتەوە”.

نوێنەرانی ڕێكخراوەكە، دەسەڵاتدارانی پۆڵەندا بە دەركردنی بەكۆمەڵی كۆچبەران و ڕێگرتن لە هەوڵی كۆچبەران تا داوای پەنابەری پێشكەش بكەن لە یەكێتی ئەوروپا تۆمەتبار دەكات، ئەمەش پشتگوێخستنی تەواوەتی پۆڵەندا دەردەخات بۆ یاسا نێودەوڵەتییەكان و یاساكانی ئەوروپا.

لەڕێی هەموو ئەوانەوە وەك لێبورنی نێودەوڵەتی باسیان دەكات”حاڵەتی بەكارهێنانی نەشیاوی هێز تۆماركراوە لەلایەن سەربازە پۆڵەندییەكان دژ بە كۆچبەران، لەو بارەیەوە یەكێك لە ئێزدییەكانی عیراق بە نوێنەری ڕێكخراوەكەی ڕاگەیاندووە كە سوپای پۆڵەندا لەگەڵ ژمارەیەك دەستگیركراوی تردا بەرەو ڕووبارێك بردوونی و پانییەكەی 10-15 مەتر بووە و قوڵ و بەخوڕ بووە لەسەر سنورەكانی وڵاتەكە لەگەڵ بیلاڕوس، لەوێوە لە ئۆتۆمبێلەكانەوە فڕێدراونەتە نێو ئاوی ڕووبارەكە و هەركەسێكیش ڕێگری بكردایە بە كوتەك دووچاری لێدان دەبۆوە.

هاووڵاتییەكی سوری دەڵێت، سەربازانى پۆڵەندی خۆی و ژنەكەی و دوو منداڵەكەیان كردۆتە سندوقی بارهەڵگرێكی سەربازییەوە و بەرەو ناوچەیەكی سنوری ڕاپێچییان كردوون، یەكێك لە سەربازەكانیش بیبەری تونی بەسەردا ڕشتوون، كاتێك گوێی لێبووە كە قسە دەكەن.