سەردێر

“حكومەت بەرپرسیاری یەكەمە لە دروستكردنی پڕۆژەكان”

خەڵك-

سەرۆكی دەستەی وەبەرهێنان ڕایدەگەیەنێت، سەیری لافاوەكەی دارەتوومان كرد بەچاو دیارە شوێنەكان پڕكراوەتەوە، ئەگەرنا ئەوە چەند ساڵێكە ڕێڕەوی ئاوەكان گیراوە.

محەمەد شوكری سەرۆكی دەستەی وەبەرهێنان بەدەنگی ئەمریكای ڕاگەیاند، كارەساتی سروشتی لە هەموو وڵاتانی دنیا ڕوودەدات، هەولێریش یەكێكە لەو شوێنانە، هەروەها لە ناوچەی دارەتوو و قوشتەپە هیچ پڕۆژەیەكی وەبەرهێنانی لەسەر نەبووە، بەڵام خەڵك زیادەڕۆیی لەسەر زەوی دروستكردووە، ڕێڕەوی ئاوەكان تێكچوون، لەماوەی چەند ساڵی ڕابردوو بارانی زۆری بەو شێوەیە نەهاتووە بۆیە هەستی پێنەكراوە، ئەگەرنا چەند ساڵێكە ڕێڕەوی ئاوەكان گیراوە، پاشماوەی خانوو دروستكردن لەناو ڕێڕەوەكان ڕۆكراوە.

سەبارەت بە لایەنی كەمتەرخەم لەو پڕۆژانە ناوبراو دەڵێت”ئێستا حكومەتی هەرێم بەڕێنمایی سەرۆك وەزیران لیژنەیەكی لێكۆڵینەوە‌و بەدواداچوونی بۆ دەرخستنی واقیعی شوێنەكان بۆ دەستنیشانكردنی ئەو شوێنانەی دەستكاریكراوە دیاریكردووە، لەگەڵ ئەوەشدا ئەو لایەنە كەمتەرخەمانەی ڕێگەیانداوە ئەم كارە بكرێت لەهەموو حاڵەتێكدا لە زریانەكەی ڕابردووشدا هەندێك لە پڕۆژەكانی ئێمە لافاو گرتنییەوە، لەئەنجامیشدا هەموو ئەو زیانانەی بەر پڕۆژەی زێڕین سیتی كەوتووە وەبەرهێنەرەكە خۆی بەرپرسیارێتی هەڵگرتووە و چاكیان بكاتەوە.

ئاماژەی بۆ ئەوەش كرد، خۆمان زەویمان بۆ خۆمان هەڵنەبژاردووە، بەڵكو لایەنی تر هەبووە ڕەزامەندی داوە، بەڵام لە زریانەكەی ڕابردووی هەولێر سەرەڕای ئەوەی ئەم بابەتە باسكراوە، بەڵام وەبەرهێنەریش ناچاركراوە ئەوە بەشێك بووە لە زیانەكان، زیانی خەڵك و چاكردنەوەی ماڵەكان‌و شەقامەكان بگرێتە ئەستۆ بۆئەمەش هەموو ڕێكارێكی یاسایی لەبەرامبەر ئەم بابەتە وەرگیراوە دواتریش ئەو وەبەرهێنەرەی كەمتەرخەم بووە سزای دراوەو ئیستاش بەردەوام لە زینداندایە.

ئاشكراشیكرد، بەرپرسیارێتی حكومەتە كە بتوانێت پڕۆژەیەكی ڕێكوپێك كەرتی تایبەت جێبەجێی بكات، خۆمان لە بەرپرسیارێتی نادزینەوە، ئێمە بەرپرسیارێتی هەڵدەگرین كە پڕۆژەكان بەباشی بەڕێوەبچن لە هەرێمی كوردستان، بەڵام بەرپرسیاریەتەكە گشتییە تەنها هی كەسێك یان دەستەیەك نییە، بەڵكو بەرپرسیارێتی حكومەتە، بەرنامە و پلانی داهاتووش ئەوەیە كە بتوانرێت باشترین كوالێتی لە پڕۆژەكان بكرێت نەك تەنها پڕۆژەی نیشتەجێبوون.