سەردێر

لەسەر شەڕە تەقەكەی گوندی كێلەسپی 4 كەس دەستگیر كران

خەڵك-

لەسەر دۆسیەی كوشتنی كەسێك و برینداربوونی دوو كەسی دیكە لە گوندی كێلەسپی مەفرەزەكانی بنكەی پۆلیسی تاسڵوجە و هێزی تایبەتی بارەگا 4 تۆمەتباریان دەستگیركرد .

بەڕێوەبەرایەتی پۆلیسی سلێمانی لە ڕاگەیەنراوێكدا ئاماژەی بەوەكردووە، ڕۆژی 17-12-2021 ، لە گوندی كێلەسپی سەربەپارێزگای سلێمانی بەهۆی ڕووداوێكەوە 3 هاووڵاتی بریندار بوون و یەكێك لەوهاووڵاتیانە دوای گەیاندنی بۆ نەخۆشخانە بەهۆی سەختی برینەكەیەوە گیانی لەدەستدا.

ڕاشیگەیاندووە، دوای گەیشتنی هێزەكانی پۆلیس و تیمەكانی بەشی پۆلیسی بەڵگەی تاوان كەشف و هێڵكاری بۆ شوێنی ڕووداوەكە كرا و دادوەر فەرمانی دۆزینەوە و دەستگیركردنی بۆ 4 تۆمەتبار دەركرد .

ئاماژەی بەوەشكردووە، پۆلیسی سلێمانی لێكۆڵینەوەكانی دەستپێكرد و سەرەنجام توانرا لەماوەیەكی كەمدا لەلایەن بنكەی پۆلیسی تاسڵوجە و بەهاوكاری مەفرەزەكانی هێزی تایبەتی بارەگای بەڕێوەبەرایەتی پۆلیسی پارێزگای سلێمانی 4 تۆمەتبار دەستگیر بكرێن .

لەئێستادا هەریەكە لە تۆمەتباران (ج ، أ ، ر لەدایكبووی 1990 و أ ، ر ، ح لەدایكبووی 1965 و ك ، ه ، ر لەدایكبووی 1978 و ر ، ر، ح لەدایكبووی 1960) بەبڕیاری دادوەر و بەپێی ماددەی 406 لەیاسای سزادانی عیراقی ڕاگیراون و لێكۆڵینەوە لەگەڵیان بەردەوامە.