سەردێر

ژمارەی بانكی بۆ هاوکاری زیانلێكەوتووانی لافاوەكەی هەولێر ڕاگەیەنرا

خەڵك
حكومەتی هەرێم دڵنیایی دەداتە هاوڵاتییانی سنووری پارێزگای هەولێر و دەڵێت، لە ئامادەباشی و كاركردن و بەدواداچوونی بەردەوامداین بۆ پێشهاتەكان و هەرچی پێویست بێت بۆ زیانلێكەوتووان و دابینكردنی پێداویستییەكانیان ئەنجامی دەدەین.

فەرمانگەی میدیا و زانیاری حكومەتی هەرێمی كوردستان لە ڕاگەیانراوێكدا بڵاویكردەوە،” بەداخەوە لە بەرەبەیانی ئەمڕۆ بە هۆی هاتنی شەپۆلێكی بەخوری باران لافاو لەچەند گوند و ناوچەیەكی سنووری پارێزگای هەولێر دروست بوو و لەئەنجامدا جگە لە زیانی مادیی زیانی گیانیشی لێكەوتەوە. وێڕای پرسە و سەرەخۆشی خۆمان لە بنەماڵە و كەسوكاری قوربانیانی ئەم كارەساتە سروشتیە، داوا لە خودای گەورە دەكەین گیانی قوربانیان بخاتە بەر دلۆڤانی خۆی و بە بەهەشتی بەرینیان شاد بكات”.

لە ڕاگەیانراوەكەدا ئەوەش هاتووە، “دڵنیایی دەدەینە سەرجەم هاوڵاتییانی سنووری پارێزگاكەمان، هەموو هەوڵ و توانایەكی خۆمان خستۆتە گەڕ و تەواوی لایەنە پەیوەندیدارەكان و هێزەكانی (ئاسایش، پۆلیس، زێرەڤانی، هاتوچۆ و بەرگری شارسانی و تەندروستی و شارەوانیەكان و ناوەندی قەیرانەكانی پارێزگا) لە ئامادەباشی و كاركردن و بەدواداچوونی بەردەوامدان بۆ پێشهاتەكان و هەرچی پێویست بێت بۆ زیانلێكەوتووان و دابینكردنی پێداویستییەكانیان ئەنجامی دەدەین”.

 

باس لە ئەوەشكراوە، ئەوەی كە ڕوویداوە لەشارەكەمان كارەساتێكی سروشتیی بەدەر لەتوانی مرۆڤ بووە و پێویست بەوە ناكات هیچ كەس و لایەنێك ئەو ڕووداوە كارەستبارەی بەسەر هاوشاریانی خۆشەویستی شارەكەماندا هاتووە بیقۆزێتەوە و بە سیاسی بكات، هەركەس و لایەنێك و گروپ و خێرخوازێك دەیەوێت دەستی یارمەتی بۆ قوربانیان و لێقەوماوان و زیانلێكەوتووان درێژبكات، دەتوانێت لەڕێگەی ژمارە حسابی (508) بانكی منارە هاوكاری و كۆمەك و یارمەتییەكانیان بگەێنن.

 

فەرمانگەی میدیاو زانیاری باسی لە ئەوەشكردووە، سوپاس و دەستخۆشی بۆ سەرجەم دام و دەزگا پەیوەندیدارەكان و ڕێكخراوە خێرخوازییەكان و هەموو ئەو كەس و لایەنانەی كە هەر لەسەرتایی ڕووداوەكەدا لەگەڵمان بوون و دەستی هاوكاری و یارمەتیان بۆ لێقەوماو و زیانلێكەوتووان درێژكرد، نموونەیان زۆربێت.