سەردێر

زانیاری نوێ لەبارەی گۆڕێكی بەكۆمەڵ لەناوچەی غەڕەوپەڵكانە بڵاودەكرێتەوە

خەڵك
هێزەكانی پێشمەرگە گۆڕێكی بەكۆمەڵیان لەناوچەی غەڕەوپەڵكانە دۆزیەوە، گومان دەكرێت قوربانیەكان ئەو سەربازە عێراقیانە بن ، كە 3 ساڵ لەمەوبەر لەنزیك خورماتوو ڕفێنران، كە تا ئێستا ڕووفاتی 11 كەس لەنێو گۆڕە بەكۆمەڵەكە دەرهێنراوە و چاوەڕوان دەكرێت ژمارەكە زیاتریش بێت.

لیوا محەمەد ڕۆستەم، جێگری فەرماندەی میحوەری قەرەتەپە- حەمرینی پێشمەرگە بە دەنگی ئەمریكا– ی ڕایگەیاندووە، لەساڵی 2018 چەكدارانی داعش لەنزیك پردی سەرحەد لەسەر ڕێگای نێوان خورماتوو- بەغدا 12 سەربازی عێراقیان ڕفاند و لەوكاتەوە چارەنوسیان نادیارە، ڤیدیۆی 12 پۆلیسە ڕفێنراوەكەی عێراقمان لایە، گومان دەكەین ئەوانەی لەنێو گۆڕەكەدان، بەشێكیان ئەو پۆلیسانە بن و خەڵكی تریشیان تێدا بێت، كە چاڵێكی گەورەیان بۆ هەڵكەندوون و هەموویان گولەبارانكردوون.

ڕاشیگەیاندووە، لەو ناوچەیەی گۆڕە بەكۆمەڵەكەی تێدا دۆزراوەتەوە دەستیشگیركراوە بەسەر چەندین گرتووخانە و حەشارگەی داعشدا، سەرجەم حەشارگە و گرتووخانەكان لەنێو تونێل و ئەشكەوتدا دروستكراون و گومان دەكرێت گۆڕی بەكۆمەڵ و گرتووخانەی زیاتری تێدا بێت، چونكە داعش لەهەموو شوێنێك خەڵكی كوشتووە، 5 ساڵە لە غەڕەوپەڵكانە خەڵك دەكوژن.

ئەمە لە كاتێكدایە ، ئۆپەراسیۆنی هێزەكانی پێشمەرگە لەناوچەی غەڕەوپەڵكانە بۆ تێكدانی حەشارگەكانی داعش بەردەوامە، ئەو ناوچەیە ماوەی 5 ساڵە پێگەی سەرەكی داعشە و بەردەوام سەرووی 40 چەكداری تێدابووە، گومان دەكرێت چەكدارەكان بەرەو ناوچەی زەرگەی ڕۆژاوای خورماتوو ڕۆیشتبن.