سەردێر

ڕاپۆرتێك دەربارەی باران بارین و ڕوودانی لافاو بڵاودەكرێتەوە

خەڵك-
بەهۆی كاریگەری دوو ناوچەی پەستان نزمی دەریای سوور و دەریای ناوەڕاست لە سبەینێوە پێنج شەممە بارانبارین لەناوچە جیاوازەكانی كوردستان دەست پێدەكات و هەفتەیەك بە دوو قۆناغ بەردەوام دەبێت.

محەمەد كەمال، شارەزای كەشناسی بۆ (خەڵك) ئاماژەی بەوەكرد، بەرەبەیانی سبەی پێنج شەممە 16ی12ی2021 كاریگەری شەپۆلەكە بەدیار دەكەوێت و سەرەتاش لەسنوری بادینان دەست پێدەكات، پاشان بەتێپەڕبونی كات و نزیك كاتەكانی نیوەڕۆ شە‌پۆلی بارانبارین دەگاتە هەولێر و كەركوك و سلێمانی و هەڵەبجە و گەرمیان و ڕاپەڕین و سەرجەم ناوچەكانی تر و ئەگەری بارانبارینی مام ناوەند هەیە بەشێوەی ناوبەناو هەندێ جاریش بەخووڕ بەتایبەت سنوری هەولێر.

ئاماژەی بەوەشكرد، لە شەوی پێنج شەممە لەسەر هەینی بەتایبەت درەنگانێكی شەو شەپۆلی دەریای سور دەگات و كاریكەری شەپۆلی دەریای ناوەڕاستیش چالاكتر دەبێت، هەربۆیە ئەگەری بارانی زۆر باش هەیە لە تەواوی ناوچەكان بەهەورە تریشقەوه، بەتایبەتیش نێوان كەركوك و هەولێر ئەگەری تاوە بارانی بەهێز هەیە لەگەڵ هاتنی لافاو، سەرجەم شارەكانی تریش ئەگەری بارانی مامناوەند بۆ باش هەیە لەچەم و دۆڵەكان ئەگەری ڕودانی لافاو هەیە.

ئەو شارەزایەی كەشناسی پێشبینی ئەوەش دەكات، كە بەشێوەیەكی گشتی تا شەوی شەممە ئەگەری بارانبارینی ناوبەناو هەیە لەهەموو شارەكان هەندێ جار ڕەنگە بەشێوەی كاتی بارانیش بوەستێت دواتر كۆتایی پێدێت و پلەكانی گەرما نزم دەبنەوە.

ڕوونیشی كردەوە، لەڕۆژی دوو شەممەی داهاتووەوە شەپۆلێكی تری بەخوڕی باران و بەفر ناوچەكە دەگرێتەوە.