سەردێر

پرۆژەكانی سلێمانی قوربانی دەستی دووئیدارەیین

ئەندامێكی ئەنجومەنی پارێزگای سلێمانی: پڕۆژەكانی سلێمانی دڵسۆزیان نییە لە نێو وەزارەتەكان شەڕیان لەسەر بكەن

خەڵك-تەنیا هەورامی

 

ئەندامێكی ئەنجومەنی پارێزگای سلێمانی ڕایدەگەیەنێت، پڕۆژەكانی سلێمانی بێ خاوەنن و دڵسۆزمان نییە تاكو لەناو حكومەت وەزارەتەكان شەڕی لەسەر بكات.

پارێزگای سلێمانی بە گشتی و ناوەندی پارێزگاكە بەتایبەتی لە چەند ساڵی ڕابردوودا پشتگوێ خراوەو كەمترین پرۆژەی تێدا جێبەجێكراوە، هاوكات ڕەخنەی توند لە حكومەتی هەرێم دەگیرێت لەبەرانبەر خەرجنەكردنی بودجەی پێویست بۆ تەواو كردن و جێبەجێكردنی پڕۆژەكان، بەشێك لە چاودێرانی سیاسی پێیانوایە، سلێمانی بووەتە قوربانی نێوان ململانێی سیاسییەكان.

كێبڕكێی ناشەریفانە لەنێوان هەولێر و سلێمانی دروست بووە

ڕەمەزان نامیق ئەندامی ئەنجومەنی پارێزگای سلێمانی بە (خەڵك)ی ڕاگەیاند، بەداخەوە بەدەستی خۆمان جۆرێك كێبڕكێیەكی ناشەریفانەمان دروستكردووە لەنێوان هەولێر و سلێمانی، بەشێوەیەك وایلێهاتووە بەدەستی ئەم دوو حزبەوە خزمەكانی هەولێر و سلێمانی بەشێوەیەكی نامۆ سەیری یەكتر دەكەن.
وتیشی”كێبڕكێیەكی زۆر دروست بووە لەنێوان پڕۆژەكانی سلێمانی و هەولێردا، كێبڕكێكە بۆ پێشخستن نییە، بەڵكو لەپێناو ئەنجامنەدان و كەوتنیەتی، كام پارێزگایان دەسەڵاتی لا هەبوو، ئەوەیان زیاتر سزای پارێزگاكەی تر دەدات، لەبەرئەوەی سەرۆكی حكومەت لە پارتییە و لە هەولێرە دەسەڵاتەكانی زیاتر چڕ بووەتەوە و زۆبەی حكومەتە لە ئەندامەكانی خۆیەتی و هەموو هەوڵێكیان بۆ ئەوەیە سزامان بدەن، جار جار هەندێك پڕۆژەی سوك جێبەجێ دەكەن كە وا خۆیان نیشان دەدەن دڵسۆزی سلێمانین”.

لە سلێمانی پڕۆژەكان لەبار دەبرێن

هەرچەندە ناوەناوە بەردی بناغەی پڕۆژەیەك دادەنرێت، بەڵام دواتر یان پشتگوێ دەخرێت، یان لەكاتی جێبەجێكردنی بودجەكەی بۆ خەرج ناكرێت، بۆ نمونە پڕۆژەی ئۆتۆبانی بابان كە50%ی تەواو بووە، بەڵام تەنها 3%ی بودجەكەی بۆ خەرج كراوە.


ڕەمەزان نامیق دەڵێت”پڕۆژەكانی سلێمانی لە دوو هۆكار بەدەر نییە، یەكەم دەستیدەستی پێكردنی پڕۆژەكانی سلێمانییە، كاتێك پڕۆپۆزەڵی شەقامی 100 مەتری سلێمانی پێشكەش كرا باسی شەقامی 120 مەتری هەولێر نەبوو، ئێستا شەقامی 150 مەتریش لە هەولێر جێبەجێكراوە، پردی دوو ساید‌و تونێل دروست دەكرێت شەقامەكان لە هەولێر فراوان دەكرێن، ئەمانە هەمووی لەژێر قەیرانی دارایی دەكرێت، قەیرانی داراییان تەنها بەسەر پارێزگای سلێمانیدا سەپاندووە، بەڵام سوودیان بۆ خۆیان لێبینیوە و پڕۆژەكانی هەولێریان جێبەجێ كردووە”.

حكومەت فێڵ لە پارێزگای سلێمانی دەكات

بەشێك لە پەڕلەمانتاران ئاماژە بۆ ئەوە دەكەن بەشێوەیەكی كردەیی هەرێمی كوردستان دوو ئیدارەی هەیە و بودجە و جێبەجێكردنی پڕۆژەی هەولێر پەیوەندی بە ئیدارەی سلێمانییەوە هەیە و هی هەولێری و دهۆكیش بە هەولێرەوە، ئەمەش كاریگەری لەسەر پڕۆژەكانی سلێمانی دروستكردووە.
ئەندامەكەی لیژنەی ئاوەدانكردنەوە لە ئەنجومەنی پارێزگای سلێمانی ڕایگەیاند، بەداخەوە پڕۆژەكانی سلێمانی بێ خاوەنن و دڵسۆزمان نییە لەناو حكومەت و وەزارەتەكان تاكو شەڕی لەسەر بكەن.
وتیشی”حكومەت فێڵێكی دیكەی كردووە و هەموو ئەو پڕۆژانەی سلێمانی كە دروستدەكرێت لەسەر داهاتی سلێمانییە بۆ ئەوەی ئەگەر یەكێتی داهاتی نەگەڕاندەوە، ئەوكات ئەنجامەكەی ئەوەیە كە پڕۆژەكانی سلێمانی تەواو ناكرێت، كەواتە ئەگەر بیگەڕێنێتەوە هەم پڕۆژەكانی تەواو دەبێت هەم لە هەولێرەوە بودجە نانێرێت بۆ سلێمانی و كەمتریش لەسەری دەكەوێت لە بودجەی داهاتی فیدراڵی و نەوتیش پارە نانێرێت، یەكێتیش 43%ی بودجە دەگەڕێنێتەوە بۆ حكومەت، ئەو پارەش بەشی پڕۆژەكان ناكات و پڕۆژەكان دەبنە قوربانی”.
ئاشكراشیكرد، ئەگەر پڕۆژەیەك دوو ساڵ كاتی بوێت بۆ تەواوكردن لە 7 بۆ 10 ساڵی دەوێت تاكو تەواو دەبێت.

گرفتەكە تەنها ناوەندی پارێزگاكە نییە

گرفتی جێبەجێنەكردنی پڕۆژەكان تەنها ناوەندی پارێزگای سلێمانی نییە، بەڵكو سەرجە قەزا و ناحیە و گوندەكانی سەر بە پارێزگای سلێمانی ڕووبەڕووی گرفتی نەبوونی پڕۆژە بوونەتەوە، بەشێوەیەك وەك ڕمەزان نامیق دەڵێت”پڕۆژەی شەقامی زەڕایەن و دەربەندیخان نزیكەی 4 ساڵە پێویستی بە 10 ملیارە كە تەواو ببێت دابین، بەڵام نەكراوە”.

ئاشكراشیكرد، بەشێوازێك كێشە بۆ پڕۆژەكان دروست دەكرێت كە هەموو بەرپرسان و دەسەڵاتداران و پەڕلەمانتاران و ئەندامانی ئەنجومەن بەردەوام خەریكی ئەوەین ئەم پڕۆژانە چارەسەر بكەین، بەڵام ساڵ تەواو دەبێت سەیر دەكەین هیچمان نەكردووە، هیچ پڕۆژەیەكی پارێزگای سلێمانی نییە كە بەبێ سەرئێشە تەواو بێت، بەڵكو دەبێت كۆمپانیا بودجەی خۆی بۆ تەرخان بكات و كاتەكەی تەواو ببێت و چەندجارێك بچێتە هەولێر، بە بەرنامە هێندە كێشەیان بۆ دروستكردووە هەمووی بە نووسراوی زۆر كێشەی بۆ دروستدەكرێت، ئەمەش لەپێناو ئەوەی پڕۆژەكانی لەكاتی خۆیدا تەواو نەكرێت.