سەردێر

“هەرچی داهات و سەرمایەی سەر زەوی و ژێر زەوی هەیە تەرخانكرا بۆ باڵەخانەو مۆڵی گەورەی بەرپرس و بنەماڵەكان”

خەڵك – ئارام سەردار

چاودێرێكی سیاسی ڕایدەگەیەنێت، هەرچی داهات و سەرمایەی سەر زەوی و ژێر زەوی هەیە تەرخانكرا بۆ باڵەخانەو مۆڵی گەورەی بەرپرس و بنەماڵەكان، ئەمانە و دەیان هۆكاری تر بوو بە هۆی كوشتن و نەمانی ئینتیما بۆ خاك و گەل و خوێن و مێژوو.


ئازاد جۆڵا چاودێری سیاسی لەبارەی ناڕەزایەتی و قەیرانە جۆراوجۆرەكانی هەرێم بە (تۆڕی میدیایی خەڵك)ی ڕاگەیاند، ئەوەی لە ماوەی ڕابردوودا سەبارەت بە كۆچی بەكۆمەڵی خەڵك لە هەرێمەوە بۆ دەرەوە ڕوویدا كارێك نییە هەروا سەرپێی سەیربكرێ تو بەئاسایی وەربگیرێ بەڵكو كۆچی بەلێشاو لە هەر كوێیەكی دونیا ڕوو بدات كۆمەڵێك بەڵگە دەخاتەڕوو، چونكە بۆ هیچ كەسێك ئاسان نییە خاك و وڵات و زێد و كەس وكارو یادگارییەكانی خۆی جێ بهێڵی و ڕوو لە دواڕۆژ و ئاسۆیەكی ڵێڵ و نادیار بكات.

دەشڵێت، هۆكارەكانی كۆچ دیارن، زۆرن، مێژویەكی درێژیان هەیە و كەڵەكەبوون تا ئێستا هەوڵی چارەسەری هۆكارەكانی كۆچكردن نەك هەر نەدراوە و پلانی بۆ دانەنراوە بەڵكو هەر بیریشی لێ نەكراوەتەوە ، ئەمەش هۆكارێكی سەرەكییە بۆ بێ ئومێدبوونی زیاتری خەڵك بەگشتی و لاوان بەتایبەتی، گەندەڵی لە ناوخۆی هەرێم بەجۆرێك بڵاوبووەتەوە بە ئەندازەیەك ڕۆچووە ڕیشەكێشانی كارێكی ئاسان نییە، لەهەمان كاتدا بێ كاری و قۆڕغكاری و نادادی ڕوو لەهەڵكشانە و خەریكە ژمارەی پێوانەیی لە جیهاندا تۆماردەكات و هیچ پلانێكیش نییە لەداهاتویەكی نزیك ئەم ژینگە تاڵە بگۆڕێ.

ناوبراو ئاماژە بۆ ئەوەش دەكات، بەدرێژایی حوكمڕانی هەرێم دانان و دیاریكردنی بڕیار بەدەست و لێپرسراو و دەسەڵاتداریەتی بەپێوەرێكی نادروست و لەسەر بنەمای حزبی و نزیكی و خزمایەتی و وابەستەیی بووە، هەرگیز كەسی شیاو لە شوێنی شیاو دانەنراوە و كەسە زیرەك و بەتواناكان دانەمەزرێنران و عەقڵ و زانست و پسپۆڕی و ئەكادیمی لەم هەرێمە پشتگوێ خراوە و لەهیچ بوارێكیشدا ئاوڕی لێ نادرێتەوە سەرچاوەی داهات كەم و بەفیڕۆدان زۆر، بێ ئەوەی پلانی ئابووری هەبێ و خەرجی و داهاتی هەرێم دیاربێ و سەرچاوەی داهات هەمە جۆر و زیاد بكرێ درێژە بەهەڵە بەردەوامەكانی ڕابردوو دەدرێت.

ئازاد جۆڵا ڕوونیشی دەكاتەوە، هەرچی داهات و سەرمایەی سەر زەوی و ژێر زەوی هەیە تەرخانكرا بۆ باڵەخانە و مۆڵی گەورەی بەرپرس و بنەماڵەكان، ئەمانە و دەیان هۆكاری تر بوو بە هۆی كوشتن و نەمانی ئینتیما بۆ خاك و گەل و خوێن و مێژوو، بۆیە خەڵك لە ئێستادا تا ئاستی تەقینەوە تووڕەو بێزارە هەربۆیەش كۆچ دەكات و ئەم ژینگە تاڵە جێ دەهێڵێ، لەم ڕوانگەیەوە دەتوانین بڵێین كۆچی بەكۆمەڵی خەڵك نەك تەنها ئابووری و كۆمەڵایەتی بەڵكو ڕەهەندێكی سیاسی بەخۆوە گرتووە هەر ئەمەش مەترسییە گەورە و ڕاستەقینەكەیە، ئەم حاڵەتەش دەبێتە زەنگێك دونیا بەئاگا دەهێنێتەوە و ڕووی ڕاستەقینەی سیستمی حوكمڕانی و ئەزموونی سیاسی نیوەچڵی هەرێمی كوردستان پیشانی خەڵك و جیهان دەدات، بەڵام مەترسییە ڕاستەقینەكە لەوەدایە تاوەك ئێستا دەسەڵاتداران و خودی حكومەتی هەرێم نەك لەهەوڵی دۆزینەوە و چارەسەرێكی بەپەلە و گونجاو نین بۆ ئەم دۆخە نالەبار و تراژیدییە بەڵكو زۆر بە ئاشكرایی و لەسەر زاری بەڕێز سەرۆكی ئەنجومەنی وەزیران هۆكارەكانی كۆچكردنی خەڵكی گەڕاندەوە بۆ مافیاكان و بازرگانیكردن بە مرۆڤەوە، گەڕاندییەوە بۆ خۆشگوزەرانی بەشێكیان كەتوانای دابینكردنی ڤیزا و كڕینی بلیتی فڕۆكەیان هەیە نەك هۆكارە ڕاستەقینە و كەڵەكە بووەكان و بێ ئومێد بوونی خەڵك لە چاكبوون و گەڕانەوەی شكۆی تاك و ژیانێكی شایستە.

باس لەوەش دەكات، مەترسییە گەورەكەش لێرەوە دەست پێ دەكات كەوا لەسەر ئاستی باڵا لەهەرێم هۆكارە ڕاستەقینەكان نادیدەبكرێ و هیچ نیەتێكیش نەبێ بۆ چارەسەری، بەردەوامی ئەم دۆخە خراپەی ئابووری و كۆمەڵایەتی و چەقبەستوویی سیاسی و ناكۆكی و ململانێكان و جموجۆڵی زیاتری داعش و هەڕەشەو مەترسییەكانی وڵاتانی هەرێمی و داڕووخانی ئابووری ناوچەكە كێشەكە قوڵتر دەكاتەوە و لێكترازانی زیاتری كۆمەڵایەتی و سیاسی بەدوای خۆیدا دەهێنێ و دۆست و هاوپەیمانەكانیشمان نیگەرانتر و دوورەپەرێزتر و دەستەوەستانتر دەكات، لەكۆتایشدا ئەم ڕاستییە تاڵە دەبێتە پەڵەیەكی ڕەش لەمێژووی سیاسی و حوكمڕانی وڵاتی ئێمە و لە دەفتەری ناوچەكە و نەوەی داهاتووشمان تۆماردەكرێ.