سەردێر

سلێمانی؛ نرخی گەراجی وەستانی ئۆتۆمبێل لەناو شار دیاریكرا

خەڵك –
لیژنەی باڵای لیژنە هاوبەشەكانی قائیمقامییەتی سلێمانی ڕایدەگەیەنێت، لەشاری سلێمانی سێ‌ جۆر گەڕاج هەیە ، كە لە هەزار دینارەوە دەست پێدەكات تا هەزار و 500 دینار بۆ هەر جۆرێكیشان ئەگەر لە 5 كاتژمێر زیاتر بوو، ئەوا خاوەن گەڕاجەكە بڕیار دەدات چ بڕە پارەیەك وەربگرێت.

دیار جەمال، ئەندامی لیژنەی باڵای لیژنە هاوبەشەكانی قائیمقامییەتی سلێمانی بەمیدیایی هاتووچۆی سلێمانی ڕاگەیاندووە، لەشاری سلێمانی سێ‌ جۆر گەڕاج هەیە كە نرخەكانیان جیاوازە ، كە جۆری A ئەو پاركانەیە، كە چەو ڕێژ یان خۆڵن ، بۆ 5 كاتژمێر هەزار دینارە.

دەشڵێت،” جۆری B ئەو پاركانەی كۆنكرێت یان قیرن‌ و چەرداغیان هەیە بۆ 5 كاتژمێر 1250 دینارە و جۆریC ئەو پاركانەی لەباڵەخانە ‌و بیناكاندان ‌و داخراون بۆ 5 كاتژمێر 1500 دینارە”.

ڕاشیگەیاندووە، بۆ هەر جۆرێكیشان ئەگەر لە 5 كاتژمێر زیاتر بوو، ئەوا خاوەن گەڕاجەكە بڕیار دەدات چ بڕە پارەیەك وەربگرێت، چونكە ئەوان ڕێگە پێدراون تا دوو ئەوەندەی پارەكە وەربگرن.

ئاشكراشیكردووە، مەرجە هەموو گەڕاجێك مۆڵەتی هەبێت ‌و كامێرای چاودێری تێدا بێت‌ و تابلۆی هەبێت‌ و نرخەكەی لەسەر تابلۆكە نوسرابێت ‌و سیاجی هەبێت‌ و هەروەها تەوالێتی تێدابێت.

ئاماژەی بۆ ئەوەشكردووە، لەبەر ئەوەی سیستمێكی ئەلكترۆنی پێشكەوتوو نییە لەگەڕاجەكاندا تا كاتی هاتن ‌و چوونی ئۆتۆمبێلەكان دیاری بكات، بۆیە ناتوانرێت بڕی پارەی كەمتر وەربگیرێت لەكاتی وەستانی ماوە كورتدا.