سەردێر

هەپەگە؛ لەبارەی تێكشكانەكانی سوپای توركیا ڕاگەیەنراوێكی بڵاوكردەوە

خەڵك –
هێزەكانی پاراستنی گەل ڕایدەگەیەنێت ، سوپای توركیا ناچار بووە لە زۆر هەرێم بكشێتەوە بەڵام لەگەڵ ئەوەشدا هەواڵی درۆ بڵاودەكاتەوە، كە گوایە زۆر ئەشكەوتیان رووخاندووە و دەشڵێت،”سوپا هیچ كاتێك ناتوانێت تێكشكانەكەی بشارێتەوە”.

ناوەندی راگەیاندن و چاپەمەنی هێزەكانی پاراستنی گەل (هەپەگە) لەبارەی هەواڵە ناڕاست و شەڕی دەروونی سوپای توركیا ڕاگەیەنراوێكی بڵاوكردەوە تێیدا هاتووە، سوپای توركیا لەم ماوەیەدا هەموو هێزێكی خۆی بەكارهێنا، بەهەموو جۆرە تەكنیكێك بێسنور هەموو رۆژێك، هەرێمەكانی پاراستنی میدیای بۆردومانكرد و بەسەدان جار چەكی كیمیایی بەكارهێنا، بەڵام لە بەرانبەر ئیرادەی پۆڵایینیان تێكچوون و سوپا جارێكی دیكە تێكشكا.

راگەیەنراوەكە بەم شێوەیەیە:
“٧ مانگ بەسەر ئۆپەڕاسیۆنی داگیركەری دەوڵەتی داگیركەری تورك تێپەڕی كە لە ٢٣ی نیساندا بە پرۆپاگەندەیەكی گەورەوە دەستیپێكردبوو. سوپای تورك لەم ماوەیەدا هەموو هێزێكی خۆی بەكارهێنا، بە هەموو جۆرە تەكنیكێك، بێسنور، هەموو رۆژێك، هەرێمەكانی پاراستنی میدیای بۆردومان كرد و بە سەدان جار چەكی كیمیایی بەكارهێنا. بەڵام لەگەڵ ئەوەشدا هەموو حسابەكانی سوپای داگیركەری تورك لە بەرانبەر ئیرادەی پۆڵایینی ئاپۆیی تێكچوون و سوپای داگیركەر جارێكی دیكە تێكشكا.

بۆ ئەوەی تێكشكانی سوپای داگیركەری و هەڵوەشانی رژێمی فاشیست بشاردرێتەوە، میدیای شەڕی تایبەتی تورك لەم رۆژانەی دواییدا بە پرۆپاگاندەیەكی گەورەوە درۆ بڵاودەكاتەوە. بەڵام ئەو بەناو بەڵگانەی كە بڵاوی دەكەنەوە و سینارۆیەكانیان بە تەواوی ئاشكران و بە تەنها بۆ هەڵخەڵەتاندنە. سوپای داگیركەر زانی كە گورزی گەورەتری بەردەكەوێت لە وەرخەلێ، تابوری عەرەبان و گردی كارتالی ئاڤاشین و بۆیەش لەو ناوچانە كشایەوە. لەگەڵ ئەوەشدا بە درۆكانی بانگەشەی ئەوە دەكات كە ئەشكەوتەكانیان هەڵوەشاندووەتەوە و لەناویان بردوون.

درۆی ئۆپەڕاسیۆنی میت

لە هەرێمی سەرحەد دوو كەس بە ناوەكانی مەزلۆم (ئەمرا ئادیگوزەل) و (سارسینا (پەروین ئارسالان) كە ٣٠ی تشرینی یەكەم خیانەتیان كرد و تەسلیمی دەوڵەتی تورك بوون، تەسلیمبوونیان وەك ئۆپەراسیۆنێكی سەركەوتووی میت پیشاندرا. هەم ئەو زانیاریانەی لەبارەی ئەوانەوە و هەم زانیاری لەبارەی ئۆپەراسیۆنەكەی میت، بە تەمامی درۆیە.

هەواڵ شەڕی دەرۆنی

هەروەها هەموو رۆژێك لەسەر دەستپێكردنی ئۆپەراسیۆنی داگیركەری لە هەرێمێكی جیاوازی باكوری كوردستان لەدژی گەریلا پرۆپاگاندەیەكی گەورە بڵاو دەكرێتەوە. لە لایەكی دیكەوە ئەو درۆیەی كە دەڵێن ‘ لە باكور هیچ گەریلایەك نەماوە’ دووبارە دەكەنەوە و لەلایەكی دیكەوە بە بەشداری دەیان هەزار سەرباز بە سەدان ئۆپەراسیۆن ئەنجام دەدرێت. ئەوەش ئاشكرای دەكات كە دەوڵەتی تورك هیچ ئەنجامێكی بەدەست نەهێناوە. لەبەرئەوەش ئەنجامی ئۆپەراسیۆنەكان بە پرۆپاگاندەیەكی گەورەوە بڵاودەكاتەوە و ئاشكرای ناكات كە كەی ئۆپەراسیۆنەكان كۆتاییان پێهاتووە.

هەروەها ناو بە ناو ناوی هاوڕێكانمان بڵاودەكاتەوە و بە هەواڵی درۆی شەڕی دەرۆنی بانگەشەی ئەوە دەكات كە هەڤاڵانمان شەهیدكراون. بەم شێوەیە هەوڵ دەدات، هەم گەلەكەمان و هەم خانەوادەی هەڤاڵانمان بێمۆڕاڵ بكات و هەستی نەتەوەپەرستی لە لای هەندێك كەس لە توركیا بەهێز بكات. هەروەك چۆن ناتوانرێت بەری رۆناكی رۆژ بگیرێت، درۆكانی دەوڵەتی توركیش لە بەرانبەر تینی رۆژ وەك سەهۆڵ دەتوێنەوە. لەبەرئەوەش پێویستە گەلە وڵاتپارێزەكەمان، رای گشتی دیموكرتی توركیا، بە پرۆپاگەندەی شەڕی تایبەتی رژێمی فاشیستی ئاكەپە و مەهەپە هەڵنەخەڵەتێن. لەبەرئەوەش هەرچەند سیناریۆ و درۆ بڵاوبكەنەوە، سوپای تورك ناتوانێت تێكچوونی خۆی لە هەرێمەكانی پاراستنی میدیا بشارێتەوە.”

هێرشەكان لە ڕێگەی ئۆبۆس و هاوەن

لە بەردەوامی راگەیەنراوەكەی هەپەگەدا هاتووە:-

“١ی كانونی یەكەم لە بارەگاكانی سەر سنورەوە بە ئۆبۆس و هاوەن، گۆڕەپانی قاشوریای هەرێمی مەتینا تۆپباران كرا.

لە ١ و ٣ی كانونی یەكەمدا سوپای داگیركەری تورك، گردی جوودی، شەهید شاهان، چەمچۆ و ڕێنچپتاخای هەرێمی زاپی بە فڕۆكەی جەنگی و بارەگاكانی سەر سنورەوە بۆردومان و تۆپباران كرد.”