سەردێر

بافڵ جەلال تاڵەبانی پەیامێكی بڵاوكردەوە

خەڵك –
هاوسەرۆكی یەكێتی نیشتمانی كوردستان ڕایدەگەیەنێت ، داعش و مەترسییەكانی هێشتا ماوە و هێرشە یەك لە دوای یەكەكانیان ئاماژەن بۆ هەوڵەكانی خۆرێكخستنەوەیان، دەشڵێت،”پێویستە ئەمجارە نەك هەر لە ڕووی سەربازی بەڵكو بیر و شانە نوستووەكانیشیان لەبن بێنین”.

بافڵ جەلال تاڵەبانی، هاوسەرۆكی یەكێتی نیشتمانی كوردستان لەبارەی پەلامارەكەی تیرۆریستانی داعش لەقەرەچوغ ڕاگەیەنراوێكی بڵاوكردەوە و تێدا ڕایگەیاندووە، پەلامارەكانی داعشی تیرۆریست و شەهیدبوونی پێشمەرگە و هاووڵاتی سڤیل لە دەڤەری قەرەچوغ بە توندی ئیدانە دەكەین، پرسە و سەرەخۆشی خۆمان ئاڕاستەی كەسوكارەكانیان دەكەین و ھیوای زوو چاكبوونەوە بۆ بریندارەكان دەخوازین.

ڕاشیگەیاندووە، ئەركی سەرشانی ھەموولایەكمانە، بەھێزی پێشمەرگە و هێزە عێراقییەكان و هاوكارانمان لە هێزە هاوپەیمانەكان لەو مەترسییە ووردتر بەئاگا بین، ئەم جارە تەنها لە رووی سەربازییەوە رووبەروویان نەبینەوە، بەڵكو بیر و شانە نوستووەكانیشیان لەبن بێنین، چونكە بیری توندڕەوی بەكردەیی چێندراوە و پێویستە ئەو بیرە توندە لە ‌پاڵ چارەسەرە سەربازییەكەدا ریشەكێش بكرێت.

لە ڕاگەیەنراوەكەدا هاتووە، كە بۆیە داوا لە ‌برایانمان دەكەم، برا پێشمەرگەكانمان، وریاتر بن لە پاراستنی ژیانی خۆیان وەك چۆن خاك و نیشتمانەكەیان دەپارێزن، چونكە دڵۆپێك خوێنی پێشمەرگە ھێندەی گەورەیی وقورسایی شاخەكان بە ئازارە بۆ ئێمە و دووبارە دروود بۆ گیانی پاكی شەھیدان و سەبووری بۆ كەسوكارەكەیان دەخوازین.