سەردێر

بەفر و باران و كڕێوە دەستپێدەكات

خەڵك-

بەهۆی كاریگەری ناوچەیەكی پەستان نزمی دەریای ناوەڕاست و هاتنی بارستە هەوایەكی سارد، شەپۆلێكی بەفر و باران ناوچەكانی هەرێم دەگرێتەوە و بەهۆی زیادبوونی خێرایی با پلەكانی گەرما بەڕێژەیەكی بەرچاو نزم دەبنەوە.

محەمەد كەمال، شارەزای كەشناسی بۆ (خەڵك) ئاماژەی بەوەكرد، سبەینێ چوار شەممە نزیك كاتەكانی دوانیوەڕۆ 2021/12/1 كاریگەری شەپۆلێكی بارانبارین و هەورە تریشقە لەناوچەكانمان بەدەردەكەوێ و سەرەتاش لەسنوری بادینان و ناوچە شاخاوییەكان و سۆران و ڕواندز و دەوروبەری ، بەتێپەڕبونی كات و كاتەكانی ئێوارە بۆ شەو، شەپۆلەكە دەگاتە هەولێر و سلێمانی و ئیدارەی ڕاپەڕین و موسڵ و مەخمور و كۆیە.

ڕاشیگەیاند، لەدرەنگانێكی شەوی چوار شەممە لەسەر پێنج شەممە شەپۆلەكە فراوانتر دەبێت و دەگاتە هەڵەبجە و پێنجوێن و شارەزور و سەیدسادق و گەرمیان و كەركوك ڕێژەی بارانەكە لەنێوان لاواز بۆ مامناوەند دەبێت.

ئەو شارەزایەی كەشناسی باسی لەوەشكرد، بەرەبەیانی ڕۆژی پێنج شەممە ئەگەری بارانی بەخوڕ و هەورە تریشقه هەیە لە ناوچەكانی (بادینان ، هەولێر و دەوروبەری ، سۆران ، دوكان ، ڕانیە ، قەڵادزێ ، نێوان چەمچەماڵ و كەركوك ) بەشێوەی تاوتاوی بەخوڕ پاشان بەشێكی ئەو هێزی شەپۆلە دەگاتە ناوچەكانی خۆرهەڵاتی گەرمیان و بارانی باش دەبارێت لەسەنتەری كەلار و كفری و ڕزگاری و پێباز و ئاستی باران لاواز دەبێت هەنێ جار مام ناوەندی دەبێت .

سەبارەت بە بەفر بارین ئاماژەی بەوەكرد، بەهۆی هاتنی بارستە هەوایەكی سارد و تێكەڵبونی بەشەپۆلەكە لەدرەنگانی شەوی چوار شەممە لەسەر پێنج شەممە بەفربارین لەحاجی ئۆمەران دەست پێدەكات و بەتێپەڕبونی كات شەپۆله بەفربارینەكە فراوانتر دەبێت، لە تەواوی ناوچە شاخاویەكانی (بادینان و سلێمانی و هەولێر) ئەگەری بەفربارینی چڕ هەیە و ئەگەرێكیش هەیە بەفر لە ناوچەكانی (چیای سەفین ، دۆڵی مەلەكان ، ماوەت ، گرمك ، هەورامان) ببارێت و ڕێژەكە لەو ناوچانە لاوازە ئەگەر ببارێت 0.9 یان 1.5 سم دەبارێ بەڵام لەسەرجەم ناوچە شاخاویەكانی هەولێر و دهۆك و سلێمانی ئەگەری بەفربارین هەیە و ڕێژەكەش لەنێوان 15 سم بۆ 25 سم هەیە و بەرگی سپی دەپۆشێت.

پێشبینی ئەوەشی كرد، “سبەینێ لەزۆربەی ناوچەكان خێرایی با چالاك دەبێت و ڕێژەكەش لەنێوان 35 بۆ 45 كیلۆمەترە لە كاتژمێرێكدا و دورنیە پێشەكی هەندێك تەپوتۆزی ناوخۆیی دروست ببێت و پلەكانی گەرماش لەم شەپۆله 8 پلە نزم دەبێتەوه”.

وتیشی، “ڕێژەی بارانەكەش بەگشتی لەنێوان 5 ملم بۆ 35 ملمە ، زۆرترین ڕێژە لەسنوری هەولێر و دهۆك و سۆران و ڕاپەڕین دەبێت واتا بەپلەی یەكەم دێت ئەم ناوچانە ، بەپلەی دوەمیش سنوری پارێزگای سلێمانی و هەڵەبجە و ناوچەكانی دەوروبەری دێت بەپلەی سێیەم كەركوك و گەرمیان دێت، كە بارانەكە لاواز بۆ مامناوەندە لەم دوو ناوچەیە “.

ڕوونیشی كردەوە، درەنگانی شەوی پێنج شەممە لەسەر هەینی كۆتایی بەم شەپۆلە دێت و كەش و هەوا ئاسایی دەبێتەوه.