سەردێر

حیزبی دێموكراتی كوردستان داوای یەكگرتنی حزبەكانی ڕۆژهەڵات دەكات

خەڵك-
كۆمیتەی ناوەندیی حیزبی دێموكراتی كوردستانی ئێران كۆبووەوە و ڕایگەیاند، بەربڵاویی ئۆپۆزسیۆنی كۆماری ئیسلامی و نەبوونی هاوپێوەندی و یەكڕیزیی هێزە سیاسییەكانی بەشێكە لە هۆكارەكانی مانەوەی زیاتری دەسەڵات.

كۆمیتەی ناوەندیی حیزبی دێموكراتی كوردستان لە ڕاگەیەنراوێكدا ئاماژەی بەوەكردووە، “بەهێزتركردنی بەرەی خەڵك لەدژی كۆماری ئیسلامی و ڕێكخستن و سازماندانی پتری خۆپیشاندان و ناڕەزایەتییەكان، ئەركێكی هەنووكەییە كە ئۆپۆزیسیۆنی كۆماری ئیسلامی و ناڕازییانی دیكەی ڕێژیم دەبێ پلانیان بۆی هەبێ”.

دەقی ڕاگەیەنراوەكە:

بەڕێوەچوونی دەیەمین كۆبوونەوەی كۆمیتەی ناوەندیی حیزبی دێموكراتی كوردستان
كۆمیتەی ناوەندیی حیزبی دێموكراتی كوردستان لە تازەترین كۆبوونەوەی خۆیدا دوایین ئاڵوگۆڕ و پێشهاتە سیاسییەكانی ناوچەكە و بارودۆخی ئێران و كوردستان، پرسی یەكگرتنەوەی دێموكراتەكان و كۆمەڵە بابەتێكی نێوخۆیی و تەشكیلاتیی خستە بەر باس.
ڕۆژی دووشەممە، ٨ی سەرماوەزی ١٤٠٠ی هەتاوی (٢٩ی نۆڤامبری ٢٠٢١ی ز)، دەیەمین كۆبوونەوەی كۆمیتەی ناوەندیی حیزبی دێموكراتی كوردستان بە بەشداریی ئەندامانی ئەسڵیی كۆمیتەی ناوەندیی هەڵبژێردراوی كۆنگرەی ١٧ی حیزب، جێگران و ڕاوێژكارانی كۆمیتەی ناوەندی و بەرپرسانی ناوەندەكانی حیزب، بەڕێوە چوو.
كۆبوونەوەی كۆمیتەی ناوەندی بە ڕاگرتنی دەقیقەیەك بێدەنگی بۆ ڕێزگرتن لە یاد و بیرەوەریی شەهیدانی حیزبی دێموكراتی كوردستان دەستی پێ كرد و لە بڕگەی یەكەمی دەستووری كاری كۆبوونەوەكەدا بەڕێز خالید عەزیزی، سكرتێری گشتیی حیزب لێكدانەوەی دەفتەری سیاسیی لەسەر بارودۆخی كوردستان، ئێران و پرسە ناوچەیی و نێودەوڵەتییەكان پێشكێش كرد كە ئەم لێكدانەوەیە بە هەڵسەنگاندن و ڕا و بۆچوونی بەشدارانی كۆبوونەوەكە دەوڵەمەندتر كرا.
لە لێكدانەوەی دەفتەری سیاسیی حیزب‌دا بە ئاماژە به تێپەڕینی نیزیك بە چوار مانگ لە دەوڵەتی ئیبراهیم رەئیسی هاتبوو كە یەكدەست‌بوونی پتری دەسەڵات لە كۆماری ئیسلامیدا بووەتە هۆی بەرتەسك‌بوونەوەی ڕۆژ لە گەڵ ڕۆژ زیاتری ئازادییەكانی خەڵك و كەڵەكەبوونی پتری قەیرانە ئابووری و كۆمەڵایەتییەكان. بەجۆرێك كە مودیرییەتی كۆمەڵگە لەلایەن حاكمییەتی سیاسیی ڕێژیمەوە، خۆی لە دەرگیركردنی خەڵك لەگەڵ كێشە و قەیرانە نێوخۆییەكاندا دەبینێتەوە و لە ئاستی نێودەوڵەتیشدا درێژكردنەوەی وتووێژەكانی بووژاندنەوەی بەرجام بە مەبەستی كڕینی كات و كەڵەوەكێشیی زیاتر بۆ وەرگرتنی ئیمتیازی پتر بووە.
لێكدانەوەی دەفتەری سیاسی بە تاوتوێی دۆخی دژواری ئابووری و كۆمەڵایەتیی خەڵك كە لە سۆنگەی مودیرییەتی ئیدئۆلۆژی و میلیتاریی ڕێژیم لە ئیدارەكردنی وڵاتدا پێك‌هاتووە، دنیابینیی و سیاسەتەكانی ڕێژیم و گەندەڵیی سیستماتیك و هەوسارپچڕاوی كاربەدەستانی كۆماری ئیسلامیی بە هۆكاری بنەڕەتیی دۆخی ئێستای وڵات زانی و ئەم ئاكامگیرییەی كرد كە كۆماری ئیسلامی بە سەرنجدان بە جەوهەری پێكهاتەكەی نە لە ئاستی نێوخۆی وڵاتدا توانای چارەسەری كێشە و قەیرانەكان و ئاوڕدانەوە و پێڕاگەیشتن به ژیان و گوزەرانی خەڵكی هەیە؛ نە بەهۆی بەردەوامیی لە سیاسەتی دەستێوەردان و قەیرانخوڵقێنیدا دەتوانێ متمانەی كۆمەڵگەی نێونەتەوەیی لە هاوكێشە ناوچەیی و نێودەوڵەتییەكاندا دەستەبەر بكا.
لێكدانەوەی دەفتەری سیاسی دواتر ئاوڕی لەوە دابۆوە كە ڕێژیم سەرەڕای ئەم دۆخە نالەبارە بەڵام لە سەركوتی ماف و داواكانی خەڵك، لە زاڵكردنی كەشی ئەمنیەتیی پتر بەسەر كۆمەڵگە، لە سیاسەتی هەڵاواردنی سیستماتیكی خۆی لە هەموو بوارەكانی ژیانی سیاسی، فەرهەنگی و كۆمەڵایەتیی خەڵكدا بەردەوام بووە. سەركوتی توندوتیژ و خوێناویی خۆپیشاندانەكان لە چەند شار و پارێزگایەكی وڵات بە كەمی یان نەبوونی ئاو كە بەشی سەرەكیی ئەو قەیرانەش بۆ سیاسەتە چەوتەكانی ڕێژیم لە مودیرییەتی كەرتی ئاو دەگەڕێتەوە، دەری دەخا كە حاكمییەتی سیاسیی كۆماری ئیسلامی هەروەك هەمیشە تەنیا زمانی سەركوت دەناسێ.
لێكدانەوەی دەفتەری سیاسی لە درێژەدا بەربڵاویی ئۆپۆزیسیۆنی كۆماری ئیسلامی و نەبوونی هاوپێوەندی و یەكڕیزیی هێزە سیاسییەكانی بە بەشێك لە هۆكارەكانی مانەوەی پتری ڕێژیم لە دەسەڵات و كەمایەسییەكی گەورە لەپێناو دروست‌بوونی ئاڵتێرناتیڤی كۆماری ئیسلامی دانا. لێكدانەوەیە بە تەكزكردن لەسەر خەسارەكانی پەڕش‌وبڵاوی ئۆپۆزیسیۆنی سەراسەری پێی لەسەر ئەوەی داگرت كە پێویستە هەوڵ و تێكۆشانەكان بەرەو ئەو ئاقارە بڕوا كە ئۆپۆزیسیۆنی كۆماری ئیسلامی بە عەقڵییەتی هەڵكردن لەگەڵ یەكتری و ڕێككەوتن و سازان لەسەر بنەما جەوهەرییەكان بەرەو بوون بە ئاڵترناتیڤی جێی متمانە بۆ لادانی كۆماری ئیسلامی هەنگاو بنێ. هەروەها بە ئاماژەدان بە ڕەوتی پەرەئەستێنی شوناس‌ویستی و بزووتنەوەی مافخوازیی خەڵكی كوردستان و سیاسەتی هەمیشەیی سەركوتی كۆماری ئیسلامی بۆ وەڵامدانەوە بە ویست و داخوازە ڕەواكانی خەڵكی كورد ئەو ئاكامگیرییەی كرد كە بەهێزتركردنی بەرەی خەڵك لەدژی كۆماری ئیسلامی و ڕێكخستن و سازماندانی پتری خۆپیشاندان و ناڕەزایەتییەكان، ئەركێكی هەنووكەییە كە ئۆپۆزیسیۆنی كۆماری ئیسلامی و ناڕازییانی دیكەی ڕێژیم دەبێ پلانیان بۆی هەبێ. لەم بەشە لە لێكدانەوەكەی دەفتەری سیاسیدا هاتبوو كە حیزبی دێموكراتی كوردستان هەم لە نێو بەرەی ئۆپۆزیسیۆنی ئێرانی و هەم لە بەرەی حیزبەكانی ڕۆژهەڵاتی كوردستاندا هەوڵی بەكردەوەی بۆ پێكهێنانی یەكڕیزی و هاوپێوەندی لەگەڵ یەكتر داوە و باوەڕی نەگۆڕی ئەوە بووە كە یەكیەتیی بەكردەوەی ئۆپۆزیسیۆن، بەردی بناغەی لادانی كۆماری ئیسلامیی ئێران و ئیدارەی ئێرانی داهاتوو بە مەبەستی چێ‌كردنی ئازادی و بەرابەری بۆ هەمووان و دەستەبەری مافە نەتەوەیی و ئازادییەكانی خەڵكی كورد و پێكهاتەكانی دیكەی ئێرانە.
لێكدانەوەی دەفتەری سیاسی بە ئاوڕدانەوە لە بەردەوامیی خۆپیشاندان و ناڕەزایەتییەكانی نێوخۆی وڵات كە بەهۆی دۆخی كارەساتباری ئابووری و كۆی قەیرانەكانی دیكەی وڵات هەر جارە و لە شوێنێكی وڵاتدا سەر هەڵدەدەن، وێڕای بەرزنرخاندنی جمۆجۆڵ و بەردەوامیی ناڕەزایەتییەكان ئەو ئاكامگیرییەی كرد كە سیاسەتی سەركوت و زەبروزەنگی كۆماری ئیسلامی پاشەكشەی بە بزووتنەوەی مافخوازیی خەڵكی وڵات نەكردووە. كۆبوونەوەی كۆمیتەی ناوەندی لە درێژەدا هیوای خواست كە ئەم تێكۆشان و ناڕەزایەتییانە لە سایەی مودیرییەتی باشتر و یەكگرتوویی زیاترەوە بتوانن لە ئاستی سەراسەریدا چالنجێكی جدی بۆ كۆماری ئیسلامی دروست بكەن.
لێكدانەوەی دەفتەری سیاسی هەروەها بە تیشك‌خستنە بەردەوامیی تێكۆشانی سیاسی و جموجۆڵە فەرهەنگی و مەدەنییەكان لە كوردستان كە تێچووی زۆریشی بۆ چالاكانی ئەم بوارانە بووە، ئاستی بەرزی شعووری نەتەوەیی خەڵكی كورد لە ڕۆژهەڵاتی كوردستانی بەرز نرخاند و جارێكی دیكەیش پێی لەسەر ئەوە داگرتەوە كە سەرخستنی بزووتنەوەی مافخوزانەی كورد لە ئێران پێویستیی پتری بە یەكڕیزی و هاوپێوەندیی بەكردەوەی حیزبە سیاسییەكانی كوردستان و هاوپێوەندییان لەگەڵ بزووتنەوە مەدنییەكانی نێوخۆ هەیە
پرسی چەندی‌وچۆنیی وتووێژەكان بۆ یەكگرتنەوەی دێموكراتەكان تەوەرێكی دیكە باسەكانی دەیەمین كۆبوونەوەی كۆمیتەی ناوەندیی حیزبی دێموكراتی كوردستان بوو. لەم پێوەندییەدا سەرەتا بەرپرسی هەیئەتی حیزبی دێموكراتی كوردستان بۆ پرسی یەكگرتنەوە، ڕاپۆرتێكی لەبارەی ڕەوتی وتووێژەكان بە كۆمیتەی ناوەندیی حیزب دایەوە. دوای باسێكی دەوڵەمەند لەلایەن بەشداری كۆبوونەوەكە، كۆمیتەی ناوەندیی حیزب دەفتەری سیاسیی ئەركدار كرد تا لە هەوڵەكانی بۆ بەئاكام‌گەیاندنی ئەو پڕۆسەیە بەردەوام بێ.
دەیەمین كۆبوونەوەی كۆمیتەی ناوەندی لە دوابەشی كاری خۆیدا چەند بابەتێكی دەروون‌تەشكیلاتی بۆ وەرگرتنی بڕیار و راسپاردەی كۆمیتەی ناوەندی خستە بەر باس و بەمجۆرە پاش چەند كاتژمێر كاری چڕوبەردەوام كۆتایی بە ئەركەكانی خۆی هێنا.
حیزبی دێموكراتی كوردستان
دەفتەری سیاسی
٩ی سەرماوەزی ١٤٠٠