سەردێر

وەزارەتی پێشمەرگە پلانی مەشقی سەربازی ساڵی داهاتووی دانا

 

خەڵك

وەزارەتی پێشمەرگە بەمەبەستی دانانی پلانی مەشقی سەربازی بۆ ساڵی 2022 كۆبووەوە.


وەزارەتی پێشمەرگە لە راگەیانراوێكدا بڵاویكردەوە، ئەمڕۆ ٣٠ی ١١ی ٢٠٢١، بەسەرپەرشتی لیوا عەبدوڵا كەریم بەڕێوەبەری بەڕێوەبەرایەتی مەشق لەوەزارەتی پێشمەرگە، بە ئامادەبوونی نوێنەری سەرجەم بەڕێوەبەرایەتییەكان و لیواكانی پیادەی وەزارەت و نوێنەری هاوپەیمانان، كۆبوونەوەی ساڵانە، بۆدانانی پلانی مەشقی سەربازی بۆساڵی ٢٠٢٢ بەڕێوەچوو.

ئاماژە بە ئەوەشكراوە، لە كۆبوونەوەكەدا باس لە گرنگی ئەنجام دانی مەشق و راهێنان بۆ هێزەكانی پێشمەرگە كرا، و بەرشێوەبەری مەشق تیشكی خستە سەر پابەندبوونی لیوا و یەكە سەربازییەكان بە كاتەكانی مەشق و راهێنان و پابەندبوونیان بە خشتەكانی مەشق و جێبەجێكردنی دسپلینە سەربازییەكان.

 

لە ڕاگەیانراوەكەدا ئەوەش هاتووە، دواتر، نوێنەری لیواكان و بەڕێوەبەرایەتیەكانی سەر بە وەزارەرتی پێشمەرگە، بۆچوونی خۆیان لەبارەی پلانی ساڵی داهاتووی مەشق خستەڕوو، ئامادەیی خۆیان دەربڕی بۆ دەستپێكردنەوەی پڕۆسەكانی مەشق لە ساڵی داهاتوودا.