سەردێر

چەند مەرجێك دانراوە بۆ ئەو هاووڵاتییانەی لە هەرێمەوە گەشت بۆ ئێران دەكەن

خەڵك
ئەو هاووڵاتییانەی لە هەرێمی كوردستانەوە گەشت بۆ وڵاتی ئێران دەكەن دەبێت كارتی ڤاكسین، پشكنینی كۆرۆنا و ڤیزای ئێرانیان پێبێت.

بەڕێوەبەرایەتیی ئاسایشی دەروازە سنوورییەكانی هەرێمی كوردستان لە ڕاگەیانراوێكدا بڵاویكردەوە، “گەشتیار لە كاتی گەڕانەوە بۆ هەرێمی كوردستان، ئەگەر كارتی ڤاكسینی هەبێت پێویست بە پشكنین ناكات، بەڵام ئەگەر كارتی پشكنینی نەبوو، ئەوا پێویستە پشكنینی بۆ بكرێت”.

لە ڕاگەیانراوەكەدا ئەوەش هاتووە، گەشتیارە ئێرانی و بیانییەكان لەكاتی گەشتكردن بۆ ئێران پێویستیان بە كارتی ڤاكسین و پشكنینی كۆرونا نابێت، بەڵام لەكاتی هاتنیان بۆ هەرێمی كوردستان پێویستە پشكنینی كۆرونا بكەن، تەنها ئەوانە نەبێت كە نیشتەجێی هەرێمی كوردستانن و كارتی نیشینگەیان هەیە و كارتی ڤاكسینیان وەرگرتووە.

باس لە ئەوەشكراوە، ئامانجی رێنماییەكان بەمەبەستی رێگریكردنە لەبڵاوبوونەوەی ڤایرۆسی كۆرۆنا كە بەگوێرەی دواین ئاماری وەزارەتی تەندروستی 374 هەزار و 167 كەس لە هەرێمی كوردستان تووشی پەتای كۆرۆنا بوون و شەش هەزار و 840 كەسیش بەپەتاكە مردون.