سەردێر

“7 پەنابەری كورد لە سنوورەكانی بیلاڕووس گیانیان لەدەستداوە”

خەڵك-

ڕێكخراوی مافی مرۆڤی هەنگاو ڕایدەگەیەنێت، پەنابەرێكی كوردی خەڵكی سەلاسی باوەجانی سەر بە پارێزگای كرماشان لە سنووری بیلاڕووس و پۆڵەندا بەهۆی سەرماوە گیانی لەدەستدا.

ڕێكخراوی مافی مرۆڤی هەنگاو لە ڕاگەیەنراوێكدا ئاماژە بۆ ئەوە دەكات، ڕۆژی دووشەممە 22-11-2021 پەنابەرێك بەناوی بەختیار موسازادە تەمەن ٢٥ ساڵ و خەڵكی سەلاسی باوەجانی لە سنووری بیلاڕووس و پۆڵەندا بەهۆی سەرماوە گیانی لەدەستدا.

ئاشكراشیكرد، بنەماڵەی بەختیار موسازادە لە ساڵی ١٩٧٩وە و لە كاتی شەڕی ئێران و عێراق لەگەڵ سەدان بنەماڵەی دیكە ئاوارەی عێراق بوون و لە كەمپی ئاڵتاش سەربە پارێزگای ڕومادی نیشتەجێ كران، دواتر لە ساڵی ٢٠٠٥ و دوای ڕووخانی حكومەتی سەدام حسێن ئەم بنەماڵانە گوازرانەوە بۆ كەمپەكانی تایبەت بە پەناخوازەكان لە سلێمانی، كەلار و هەولێر و بنەماڵەی بەختیاریش لە كەمپی باریكە لە نزیكی سلێمانی بەناوی كەمپی باریكە نیشتەجێ بوون.

بەپێی زانیارییەكانی هەنگاو، لە سەرەتای ساڵی 7 مانگی ڕابردوودا، لانیكەم ٧ پەنابەری كوردی خەڵكی كرماشان، سەلاسی باوەجانی، مەریوان ٣ كەس و سەردەشت ٢ كەس لەكاتی چوون بۆ ئەوروپا گیانیان لەدەستداوە كە دوو كەسیان ژن بوون.