سەردێر

شەپۆلێكی نوێی كۆرۆنا دەستی پێكرد

خەڵك-
وەزارەتی تەندروستی عێراق ئامانج لە دروستكردنی كارتی نێودەوڵەتی ڤاكسین ئاشكرادەكات و ڕایدەگەیەنێت، كە شەپۆلی نوێی كۆرۆنا لە چەند وڵاتێك دەستی پێكردووە.

ڕیاز حەلفی، بەڕێوەبەری تەندروستی گشتی لە وەزارەتی تەندروستی عێراق بۆ ئاژانسی فەرمی (العراقیە) ئاماژەی بەوەكردووە، كارنی نێودەوڵەتی ڤاكسین دەبێتە مەرجێكی گەشتكردن، بۆیە پێویستە لەسەر هاووڵاتیان، كە دەیانەوێت گەشت بكەن داواكاری پێشكەش بكەن بۆ وەرگرتنی ئەو كارتە.

ڕاشیگەیاندووە، دەركردنی كارتی نێودەوڵەتی ڤاكسین ئامانج لێی زیاتر وەرگرتنی ڤاكسین و گرنتی كردنی تەندروستی هاووڵاتیانە.

ئاماژەی بەوەشكردووە، شەپۆلی نوێی كۆرۆنا دەستی پێكردووە و لە چەند وڵاتێكی جیهان ڕووی لە هەڵكشان كردووە، بۆیە وەرگرتنی ڤاكسین پارێزگاری بەڕێژەی 80% بۆ هاووڵاتیان دەستەبەر دەكات لە مەترسییەكانی تووشبوون.

جەختیشی كردۆتەوە، جۆرە گۆڕاوە نوێیەكانی كۆرۆنا تا ئێستا توێژینەوەیان لەسەر نەكراوە، جگە لە گۆڕاوی دەلتا، كە دەركەوتووە ڤاكسین كاریگەری زۆری لەسەر كەمكردنەوەی نیشانەكانی تووشبوون هەیە.