سەردێر

یەكێتی هەڵوێستی لەسەر خۆپیشاندانی خوێندكاران ڕاگەیاند

خەڵك-
وتەبێژی یەكێتیی نیشتمانیی كوردستان ڕایدەگەیەنێت، كە پشتیوانی لە داخوازییەكانی خوێندكاران دەكەین و داواش لە هێزە ئەمنییەكان دەكات، “توندوتیژی دژی خوێندكاران بەكارنەهێنن”.

ئەمین بابه شێخ، وتەبێژی یەكێتی نیشتیمانی كوردستان سەبارەت بە خۆپیشاندانی خوێندكاران لە شوێنە جیاوازەكانی هەرێمی كوردستان پەیامێكی بڵاوكردەوە و ڕایگەیاندووە، “یەكێتی نیشتمانی كوردستان پشتیوانی لەداخوازییە ڕەواكانی خوێندكاران دەكات” و داوا لەحكومەتی هەرێمی كوردستانیش دەكات داواكارییەكانی خوێندكاران لەبەرچاو بگرێت و پارەی مانگانەیان بۆ خەرج بكات و كێشەكانیان بۆ چارەسەر بكات.

ڕاشیگەیاندووە، داوا لە هێزە ئەمنییەكان دەكەین توندوتیژی دژی خوێندكاران بەكارنەهێنن، چونكە داوای مافە ڕەواكانیان دەكەن.

وتەبێژی یەكێتی داوای لە خوێندكارانیش كرد، “خۆپیشاندان بە شێوەیەكی ئاشتییانە ئەنجام بدەن و ڕێگە نەدەن لە لایەن هیچ كەس و لایەنێكی نا بەرپرسەوە دۆخەكە بشێوێنرێت”.