سەردێر

ئەنجامی دەنگەكانی 12 كاندید گۆڕانكارییان بەسەردا هات

خەڵك-
بەهۆی جیاكردنەوەی دەستی دەنگەكان و یەكلایی كردنەوەە ئەنجامی تانەكان لەلایەن كۆمسیۆنی باڵای سەربەخۆی هەڵبژاردنەكانی عێراقەوە، ئەنجامی دەنگەكانی 12 كاندید، كە دووانیان سەر بە یەكێتی و دووانیان سەر بە پارتی-ن گۆڕانكارییان بەسەرداهات لە بەرژەوەندی یەكێتی.

سەرچاوەیەكی سیاسی بە ماڵپەڕی (العهد نیوز)ی عێراقی ڕاگەیاندووە، دوای بڕیاری دەستەی دادوەری بۆ پەسەند كردنی تانەكانی ژمارەیەك لە كاندیدەكان، گۆڕانكاری لە ئەنجامی هەڵبژاردنە پەڕلەمانییەكەی 10ی مانگی ڕابردوو ڕوویداوە.

ڕاشیگەیاندووە، بەپێی بڕیارەكانی دادوەری، كاندیدێكی ڕەوتی حیكمە بەناوی (صادق مەدلول) لەشوێنی كاندیدی سەربەخۆ (ئەمیر مەعموری) لە بابل سەركەوتنی بەدەستهێناوە و هەروەها (خالید عوبەیدی) كاندیدی هاوپەیمانی عەزم لە بەغدا لەشوێنی (عەباس حسین) كاندیدی گرێبەستی نیشتمانی سەركەوتووە بۆ پەڕلەمان.

بە وتەی سەرچاوەكە، “دوو كاندیدی یەكێتی لە هەولێر و نەینەوا سەركەوتوون و كورسییەكانیان لە كاندیدەكانی پارتی بردۆتەوە، كە ئەوانیش (هەرێم كەمال ئاغا) لەشوێنی (لەیلا ئەكرەم) لە هەولێر و (ڕونزی زیاد) لەشوێنی (عەبدولسەلام شەعبان) لە نەینەوا”.

ئاشكراشی كردووە، كانیدێكی هاوپەیمانی فەتح بەناوی (غەریب عەسكەر ناجی) لەشوێنی كاندیدی توركمان (سەوسەن عەبدولواحید) لە كەركوك سەركەوتووە و هەروەها كاندیدێكی فەتح بەناوی (ڕەفیق هیشام) لەشوێنی كاندیدی مستەقبەل (هەیسەم عەبدولجەبار) لە بەسرە سەركەوتنی بەدەستهێناوە.