سەردێر

ئەنجامی كۆتایی هەڵبژاردنەكەی عێراق ڕادەگەیەنرێت

خەڵك-
كۆمسیۆنی باڵای سەربەخۆی هەڵبژاردنەكانی عێراق ئاشكرای دەكات، كە هەفتەی داهاتوو یەكلایی كرەوە دەبێت و بەئەگەرێكی زۆرەوە دواین ئەنجامی هەڵبژاردن ڕادەگەیەنرێت.

لە 10ی مانگی ڕابردوو هەڵبژاردنی پێشوەختە بۆ پەڕلەمانی عێراق ئەنجام درا، بەلام تەنها ئەنجامە بەراییەكان ڕاگەیەنراوە و زیاتر لە 40 ڕۆژ تێپەڕیوە هێشتا ئەنجامی كۆتایی بەهۆی زۆری سكاڵا و تانەكانەوە ڕانەگەیەنراوە.

حەسەن سەلمان، بەڕێوەبەری بەشی راگەیاندن و پەیوەندیە جەماوەریەكانی كۆمسیۆن لە لێدوانێكی ڕۆژنامەوانیدا ڕایگەیاندووە، ژمارەی ئەو تانانەی لەسەر هەڵبژاردنەكان پێشكەش كراون گەیشتوونەتە زیاتر لە 1000 سكاڵا و كۆمسیۆنیش لەماوەیەكی دیاریكراوی یاساییدا پێشكەشی دەستەی دادوەری كردوون.

ڕاشیگەیاندووە، تا ئێستا 6 تانە لە دەستەی دادوەرییەوە گەڕێنراونەتەوە بۆ كۆمسیۆن و كاریان لەسەر دەكرێت و لەماوەیەكی كەمدا یەكلایی دەكرێنەوە و دوای بڕیاری دەستەی دادوەری دەردەكەوێت، كە ئاخۆ ئەنجامی هەڵبژاردنەكان گۆڕانكاری بەسەردا دێت یان نا.

جەختیشی كردۆتەوە، ڕاگەیاندنی ئەنجامی كۆتایی هەڵبژاردنی پەڕلەمان هەفتەی داهاتوو یەكلایی دەبێتەوە، بۆیە ئەگەری هەیە لەناوەڕاستی هەفتە یاخود كۆتاییەكەی ئەنجامەكان ڕابگەیەنرێن.