سەردێر

عێراق پارە ڕەوانەی هەرێم دەكات

خەڵك-
وەزارەتی بازرگانی عێراق ئاشكرای دەكات، كە “بڕیاری خەرج كردنی بڕی 99 ملیار دیناری دیكە وەك شایستەی دارایی جوتیاران دراوە” كە بەشی جوتیارانی هەرێمی كوردستانیش تێدایە.

عەلا جبوری، وەزیری بازرگانی عێراق لە بەیاننامەیەكدا ئاماژەی بەوەكردووە، دەستیان بە خەرج كردنی بڕی 99 ملیار دینار كردووە وەك شایستەی دارایی بۆ جوتیاران بۆ بەشە گەنمی ئەمساڵ.

ڕاشیگەیاندووە، لایەنی دارایی و كارگێڕی لە كۆمپانیای گشتی بازرگانی دانەوێڵە چاوەڕێی ناردنی پارەكەن بۆ هەژمارەكەیان لەلایەن وەزارەتی داراییەوە تاوەكو كاری پێویست بكەن بۆ دابەشكردنی بڕی پارەكە بەسەر شارەكاندا و كردنی چەكی بانكی بۆ جوتیاران.

ئاماژەی بەوەشكردووە، هەماهەنگی بەردەوام هەیە لەگەڵ وەزارەتی دارایی بۆ ڕەوانەكردنی پارەكە، كە شایستەی جوتیارانە بە مەبەستی دابەشكردنی لەلایەن كۆمپانیای گشتی بازرگانی دانەوێڵە و پێدانی تەواوی پارەی گەنمی جوتیاران.