سەردێر

تەرمی 10 كۆچبەر لەناو بەلەمێكدا دۆزرانەوە

 

خەڵك-
ڕێكخراوی پزیشكانی بێسنوور، دۆزینەوەی تەرمی 10 كۆچبەر لەناو بەلەمێكی پر لە كۆچبەراندا لە بەرانبەر كەنارئاوەكانی لیبیا ڕادەگەیەنێت.

ڕێكخراوی پزیشكانی بێسنوور لە بەیاننامەیەكدا ڕایگەیاند”بەلەمێكی سەر بە ڕێكخراوەكە (جیو پارنتس) 99 كۆچبەری لە بەلەمێكدا ڕزگاركردووە، لەنێو بنی بەلەمەكەشدا كە قەرباڵغ بووە، 10 كەس بە مردوویی لە پاش خنكان دۆزرانەوە، ئەمەش دوای 13 كاتژمێر لە ڕێكردن لە دەریادا لەدوای هەڵكشان و داكشانی شەپۆلەكانی دەریا”.

دەیان هەزار كەس لەڕێی دەریای ناوەڕاستەوە هەوڵ دەدەن لە لیبیا یان تونس یان توركیاوە بگەنە ئەوروپا و زۆر جار ئاراستەی ئەو كۆچبەرانەش بەرەو وڵاتی ئیتاڵیایە.

ئەو گەشتە مەترسییەكی زۆر هەیە، بەو وتەی فلافیۆ دی جیاكۆكو وتەبێژی ڕێكخراوی نێودەوڵەتی كۆچ، لەمساڵدا لانی كەم 1236 كەس لەو ڕێگەیەدا گیانیان لەدەستداوە، لەبەرانبەر گیان لەدەستدانی 858 كەس لە هەمان ماوەی ساڵی 2020.