سەردێر

“قەرەبووی ئەو کۆچبەرانە ناکرێتەوە، کە لەبیلاڕوسیاوە دەگەڕێندرێنەوە”

 

خەڵك ـ نزار جەزا
سەرۆكی لیژنەی پەیوەندییەكان و ڕەوەندی كوردستان لەپەرلەمانی كوردستان ڕایدەگەیەنێت، ئەو كۆچبەرانەی لەبیلاڕوسیاوە دەگەڕێندرێنەوە خاكی هەرێمی كوردستان و عێراق هیچ قەرەبویەك ناكرێنەوە و بڕیارە لەم چەند ڕۆژەشدا لیژنەیەك بنێرن بۆ ئەو وڵاتانەی كۆچبەری كوردی لێیە.

ڕێبوار بابكەیی، سەرۆكی لیژنەی پەیوەندییەكان و ڕەوەندی كوردستان لەپەرلەمانی كوردستان بە(خەڵك)ی ڕاگەیاند، لەماوەی چەند ڕۆژی ڕابردوودا توانیویەتی ناوی سەدان خێزان و گەنج تۆماربكات، كە دەیانەوێت بۆ هەرێمی كوردستان بگەڕێنەوە، كە لەڕێگەی باڵیۆزی عێراق و نوێنەرایەتی هەرێم لە ڕوسیا ئەم هەوڵانەدراون و بەشێك لەو كۆچبەرانەش ڕاستەوخۆ پەیوەندییان بەخۆیەوە كردووە.

ئاماژەی بەئەوەشدا، گەشتی یەكەم بۆ ئەو كۆچبەرانەی دەیانەوێت لەبیلاڕوسیاوە بگەڕێنەوە، ڕۆژی پێنج شەممە ئەنجامدەدرێت، كە سەرەتا فڕۆكەكە دەچێتە بەغداد لەوێشەوە دێت بۆ هەولێر.

باسی لەئەوەشكرد، تاكو ئەم چركەیە كۆچبەران خۆیان یان كەسوكاریان لەكوردستان لەڕێگەی ژمارە مۆبایلەكەیەوە كە واتسئەپی لەسەرە ناو و پاسپۆرتی كۆچبەرەكانی بۆ دەنێرن، بۆئەوەی بیانگەڕێننەوە.

وتیشی: ئەگەر كەسێكیش پاسپۆڕتەكەی ونكردبێت، ئەوا پاسپۆڕتی كاتی بۆ دروستدەكەن، بۆئەوەی بیانهێنینەوە.

لەبارەی تێچووی گێڕانەوەی كۆچبەرەكان ناوبراو ئاشكرایكرد، تێچووی گێڕانەوەی ئەو كۆچبەرانە بەشێكی لەئەستۆی حكومەتی عێراقە، بەشێكی دیكەشی لەسەر ئەستۆی حكومەتی هەرێمە.

ناوبراو لەبارەی قەرەبووكردنەوەی ئەو كۆچبەرانەی دەگەڕێندرنەوە دەڵێت: تاكو ئێستا هیچ بڕیارێك نییە بۆ قەرەبووكردنەوەی ئەو كۆچبەرانەی دەگەڕێندرێنەوە، چونكە لەسەر خواستی خۆیان ڕۆشتوون و لەسەر داخوازی خۆشیان دەگەڕێنەوە و خۆشیان پێیان خۆشە بگەڕێنەوە، چونكە بارودۆخی ئەوێ زۆر خراپە.

ئەوەشی باسكرد، بەشێك لەكۆچبەران پەیوەندییان كردووە و پرسیاردەكەن لەوەی بچنە كەمپەكان یان نا؟ وەك سەرۆكی لیژنەی پەیوەندییەكان و ڕەوەندی كوردی ڕێنماییكردوون، كە بچنە نێو كەمپەكان بۆئەوەی سەلامەتبن تائەوكاتەی چارەنووسیان دیاریدەكرێت و ئەگەر بشیانەوێ بگەڕێنەوە ئاسانتر دەستیان پێیاندەگات.

ناوبراو لەبارەی هۆكارەكانی كۆچی بەلێشاوی هاوڵاتییان ئاماژەی بەئەوەدا، هۆكارەكان زۆرن، بەڵام خەڵك هەیە كاری هەبووە و ویستوییەتی كاری باشتر بكات، بۆنموونە هەیە بازرگانی زێڕە، هەندێكی دیكە حەزی كردووە ببێتە خاوەن ڕەگەزنامەی وڵاتێكی دیكە و حەزی لێبووە، بەشێكیشی بێكاربووە و بەدوای هەلیكاردا چووە، بەڵام خەڵكی دیكە هەبووە فەرمانبەرە و دەوامەكەی كردووە بەمۆڵەت و كۆچی كردووە، تەنانەت هەیە پارەی باشی هەبووە زیاتر لە 20 هەزار دۆلاری خەرجكردووە، لەبەرامبەردا خەڵك هەیە قەرزیكردووە بۆ كۆچكردنەكەی.

هەر لەبارەی هۆكارەكانی كۆچەوە زیاتر ڕوونیكردەوە، بیمەی ژیان و بیمەی تەندروستی وەك پێویست لەهەرێمی كوردستان نییە یان هەرنییە، كە ئەمەش ئەركی وەزارەتی كار و كاروباری كۆمەڵایەتی و وەزارەتی تەندروستی و وەزارەتە پەیوەندیدارەكانە ئەم گرەنتییانە بەژیانی هاوڵاتییان بدەن، دواتریش لەڕێگەی پەڕلەمانی كوردستانەوە بە پڕۆژەیاساكان دڵنیایی جۆریی بۆ ژیان و بیمەی تەندروستی بۆ هاوڵاتییان دەستەبەربكەن.

لەبارەی هەوڵەكانی حكومەت و پەرلەمانی كوردستان بۆ ئەنجامدانی كۆبوونەوەی تایبەت بەكۆچی گەنجان ناوبراو ئاماژەی بەئەوەشدا، پێشتر لەمانگی 10دا یاداشتێكیان پێشكەشكرد بۆئەوەی لەپەرلەمانی كوردستان بەئامادەبوونی پێنج وەزیر كۆبوونەوەیەك بۆ ئەو مەبەستە ئەنجامبدەن، بەڵام بەهۆی هەندێك پشێوییەوە كۆبوونەوەكە ئەنجامنەدرا، ئێستاش لەم چەند ڕۆژەدا بەنیازن سەردانی ئەو وڵاتانە بكەن كە كۆچبەری كوردی لێیە و لەگەڵیان دادەنیشن و دواتریش لەگەڵ بەرپرسانی ئەو وڵاتانە كۆدەبنەوە.

ناوبراو زیاتر ڕوونیكردەوە، لەئەنجامی ئەو سەردانەدا ڕاپۆرتێك ئامادەدەكەن و پاش گەڕانەوەیان بۆ كوردستان داوای كۆبوونەوەیەكی پەرلەمانی كوردستان دەكەن، بۆئەوەی ئەنجامی سەردانەكەیان بخەنەڕوو.

سەرۆكی لیژنەی پەیوەندییەكان و ڕەوەندی كوردستان لەپەرلەمانی كوردستان وتیشی: (07504463717) ئەوە ژمارە مۆبایلەكەمە، هەر كەسێك بیهەوێت لەبیلاڕوسیاوە بگەڕێتەوە دەتوانێت پەیوەندیم پێوەبكات لەڕێگەی واتسئەپەوە.