سەردێر

ئێران حاڵەتی لەناكاو و فریاگوزاری ڕاگەیاند

خەڵك-
سەرۆكی دەستەی فریاگوزاری لەناكاوی ئێران حاڵەتی لەناكاوی بەپەلەی لە باشووری وڵات و ئەو ناوچانەی بوومەلەرزە لێیداون لە پارێزگای هورمزگان ڕاگەیاند.

جەعفەر میعادفەڕ، سەرۆكی دەستەی فریاگوزاری لەناكاوی ئێران بۆ میدیای فەرمی وڵاتەكەی ئاماژەی بەوەكردووە، دەستەی فریاگوزاری لەناكاو ئامادەكاری تەواوی دەستپێكردووە بۆ پێشكەشكردنی هاوكاری بەو ناوچە دوورەدەستانەی بوومەلەرزە لێیداون لە باشوووری وڵات.

ئاماژەی بەوەشكردووە، نەخۆشخانەكانی هەردوو پارێزگای كرمان و هورمزگان ئامادەكارییان كردووە بۆ وەرگرتنی هەر بریندارێك، كە لە ڕوودانی بوومەلەرزەكە كەوتبێتەوە.

ڕاشیگەیاندووە، دەستیان بە هەڵسەنگاندنی زیانەكانی ڕووداوەكە كردووە و فڕۆكەكانی فریاگوزاری وڵات گەیشتوونەتە ناوچە زیانلێكەوتووەكانی بوومەلەرزەكە و ئۆتۆمبێلی فریاگوزاری چوونەتە ناوچەكە بۆ هاووكاری هاووڵاتیان.

بەپێی هەواڵی میدیاكانی ئێران، تا ئێستا دوو كەس بەهۆی بوومەلەرزەكانەوە گیانیان لەدەستداوە و كارەبای بەشێكی ناوچەكان پچڕاوە.

نیوەڕۆی ئەمڕۆ دوو بوومەلەرزەی بەهێز بە گوڕی (6.3 و 6.4) پلە بە پێوەری ڕێختەر شاری (لافت) لە دورگەی قشم لە گەرووی هورمز ڕوویاندا و بەهۆیەوە هاووڵاتیان لەماڵەكانیان چوونەتە دەرەوە و زۆربەی هاووڵاتیان لە شاری دوبەی-ش هەستیان بە بوومەلەرزەكە كردووە.

May be an image of ‎text that says '‎اخبار حوادث‎'‎