سەردێر

هاوپەیمانی نێودەوڵەتی: هەسەدە سەلماندوویەتی كە هێزێكی زەمینیی كاریگەرە

خەڵك

هاوپەیمانیی نێودەوڵەتی ڕایدەگەیەنێت، هێزەكانی سوریای دیموكرات (هەسەدە) سەلماندوویەتی كە هێزێكی كاریگەرە و ئاماژە بەوەش دەكات، هێزەكانیان و هەسەدە لە كاركردن پێكەوە بە مەبەستی لەنێوبردنی ڕێكخراوی داعش بەردەوام دەبن.
هاوپەیمانیی نێودەوڵەتیی دژی داعش ڕۆژی پێنجشەممە 11-11-2021 لە جریوەیەكدا لە تۆڕی كۆمەڵایەتی تویتەر بڵاویكردەوە، “شەوی ڕابردوو هێزەكانی سوریای دیموكرات و هێزەكانی هاوپەیمانیی نێودەوڵەتی چەند ئۆپەراسیۆنێكیان لە باكووری ڕۆژهەڵاتی سوریا ئەنجامداوە”.

لە جریوەكەدا هاتووە، “لە ئەنجامی ئۆپەراسیۆنەكەدا قاچاغچییەكی داعش دەستگیركرا” و ئەوەش خراوەتەڕوو، ئەوەی ئەنجامیان داوە بریتیبووە لە بەشێك لە هەوڵە بەردەوامەكانی هەسەدە بۆئەوەی ڕێگە نەدات داعش ڕیزەكانی ڕێكبخاتەوە و ڕێگەش نەدات هیچ شوێنێكی ئارام بۆ چەكدارانی ئەو ڕێكخراوە تیرۆریستییە هەبێت.

هاوپەیمانیی نێودەوڵەتی لە بەشێكی تری جریوەكەدا ئەوەی خستووەتەڕوو، “هەسەدە سەلماندوویەتی كە هێزێكی زەمینیی كاریگەرە” و دەشڵێت، هەسەدە و هاوپەیمانیی نێودەوڵەتی بەردەوام دەبن لە پێكەوە كاركردن بۆ بەئامانجكردنی پلانداڕێژەرانی كردەكانی داعش، ئەوانەی كارئاسانییان بۆ دەكەن و هەروەها چەكدارەكانیان، بۆئەوەی دڵنیا ببنەوە لە تێكشكاندنی یەكجارەكیی ڕێكخراوە تیرۆریستییە.