سەردێر

لیتوانیا و پۆڵەندا بۆ ڕووبەڕووبوونەوەی كۆچبەران هێز ڕەوانەی سەرسنورەكان دەكەن

بیلاڕوسیا تۆمەتبار دەكەن

خەڵك-
ئەگنی بیلۆتایتی وەزیری ناوخۆی لیتوانیا ئاماژە بە ڕەوانەكردنی هێز دەكات بۆسەر سنورەكانی پۆڵەندا و بیلاڕوس، پۆڵەنداش باس لە بڵاوكردنەوەی هێز دەكات لە سنورەكانی لەگەڵ بیلاڕوس.

هەندێك لە میدیاكان لەزاری وەزیری ناوخۆی لیتوانیاوە بڵاویانكردەوە، بەهۆی شەپۆلی كۆچبەران لە ناوچەكە، هێزییان ڕەوانە كردووە، ئاژانسی (رۆیتەرز)یش لەزاری بیلۆتایتی بڵاویكردەوە، حكومەتی وڵاتەكەی ئەمڕۆ گفتووگۆ لەسەر سەپاندنی باری نائاسایی دەكات لەسەر سنورەكانی لەگەڵ بیلاڕوس.

پێشتر دەزگای پاسەوانی سنورەكانی بیلاڕوسیا ڕایگەیاندبوو، سەدان كۆچبەری بیانی ڕوویان لە سنورەكان كردووە لەگەڵ پۆڵەندا، لای خۆیەوە پۆڵەندا لایەنی بیلاڕوسی بە هەوڵدان بۆ ئاڵۆزكردنی ڕەوشەكە لەسەر سنور و كەوتنەوەی قوربانیان، تۆمەتبار كردبوو.

وارشۆ دەسەڵاتدارانی مینسكی بە ئامادەكاریی بۆ گواستنەوەی كۆچبەران لەڕێی سنورەكانەوە تۆمەتبار كرد و ئەو پرۆسەیەشی بە بە گەورەترین دزەكردن بۆ نێو خاكی وڵاتەكەی ناوبرد.

بیوتر فافجیك، جێگری وەزیری دەرەوەی پۆڵەندا، ڕایگەیاند:”ڕەوشەكە بەمشێوەیە نامێنێتەوە، بەڵكو دەسەڵاتدارانی بیلاڕوسی هەوڵدەدەن ئاڵۆزتری بكەن، ئەم ئاڵۆزكردنەش كوژراوی لە هەردوولا لێدەكەوێتەوە”.

ماچێ‌ فۆنسیك، وەزیری ناوخۆی پۆڵەندا بە تەلەفیزیۆنی نیشتمانی وڵاتەكەی ڕاگەیاند، پۆڵەندا هێزی دژە تیرۆری لەسەر سنورەكان لەگەڵ بیلاڕوس بڵاوەپێكردووە.

بە وتەی فۆنسیك”هێزی زیاترمان ڕەوانەی سنورەكان كردووە، هێزەكانی پاسەوانی سنوریش خراونەتە ئەوپەڕی ئامادەباشییەوە، بە هەمان شێوە ئەمڕۆ هێزی دژە تیرۆرمان ڕەوانەی سەر سنور كرد، 12 هەزار سەربازی سوپای پۆڵەنداش لە ناوچە سنورییەكاندان”.